عالمی کپ کےلئے بہترین ٹیم میدان میں اُتاریں گے:انضمام

پشاور(آئی این پی)آسٹریلیا کے ہاتھوں بدترین شکست کے باوجود چیف سلیکٹر انضمام الحق نے ٹیم کا دفاع کرتے ہوئے کہا کہ ہمارے کھلاڑیوں نے اچھا کھیلا۔زیادہ میچز کھیلنے سے بیٹسمین کی کارکردگی بہتر ہوتی ہے،ہمیں اچھے فاسٹ بولرز ملے ہیں۔انہوںنے کہاکہ آسٹریلیا کے خلاف آخری دو ون ڈے میں پاکستانی ٹیم نے فائٹ کی۔پشاور میں انڈر 17ٹیلنٹ کے ٹرائلز کے موقع پر بات چیت کرتے ہوئے انضمام الحق نے کہا کہ ورلڈ کپ کے لیے تیاری ہورہی ہے، کھلاڑی تیار ہے ورلڈ کپ کے لیے اچھی ٹیم بنے گی اور گرین شرٹس فیورٹ ہوگی۔ انضمام الحق کا کہنا تھا کہ ہمارے 7سے 8کھلاڑی آرام کررہے تھے اور آخری دو میچوں میں 10کھلاڑی باہر تھے لیکن کھلاڑیوں نے خوب جان ماری۔پاک آسٹریلیا سیریز سے متعلق بات کرتے ہوئے انہوں نے کہا کہ اہم کھلاڑی نہ ہونے کے باوجود ٹیم نے اچھی کارکردگی دکھائی،ٹیلنٹ ہنٹ کے حوالے سے چیف سلیکٹر نے کہا کہ خیبر پختونخواہ میں اتنا ٹیلنٹ ہے کہ لگتا ایسا ہے کہ آدھی ٹیم خیبر پختونخواہ سے بنے گی، خیبر پختونخواہ کے دور دراز علاقوں سے 6 ہزار کھلاڑیوں نے ٹرائلز دیے ہیں، اچھی کارکردگی کے حامل کھلاڑیوں کی بھرپور حوصلہ افزائی کریں گے، سلیکٹ کیے گئے کھلاڑیوں کے ساتھ 2 سال کا معاہدہ کیا جائے گا۔