حسین حقانی نے بلیک واٹر کو ویزے دیئے‘ اچکزئی بھی سب کے سامنے: شاہد لطیف، موجودہ مالی سال میں بینکوں کی وصولی کی صورتحال خراب ہے: شاہد صدیقی ،آسٹریلیا سے سیریز ہارنا ٹیم کی کارکردگی پر سوالیہ نشان ہے: اقبال قاسم کی چینل ۵ کے پروگرام ” نیوز ایٹ 7 “ میں گفتگو

لاہور (مانیٹرنگ ڈیسک) سابق ٹیسٹ کرکٹر اقبال قاسم نے کہا ہے کہ آسٹریلیا سے سیریز ہارنا ٹیم کی کارکردگی پر سوالیہ نشان ہے ورلڈ کپ سر پر ہے ٹیم کی ناقص کارکردگی پر شائقین بہت مایوس ہیں۔ جوابدہی ہونی چاہئے اس کا ذمہ دار کون ہے۔ چینل فائیو کے پروگرام ”نیوز ایٹ سیون“ میں گفتگو کرتے ہوئے انہوں نے کہا کہ میرے خیال میں جو بھی ذمہ دار ہے وہ غلطی تسلیم کرتے ہوئے عہدہ چھوڑے اور عوام کو وضاحت کرے تاکہ عوام بھی مطمئن ہوسکیں۔ اگر باہر کے لوگوں کو رکھیں گے تو انہیں حالات کا پتہ نہیں ہوتا صرف کاسمیٹکس سرجری سے مسائل حل نہیں ہوتے۔ پاکستانی ٹیم بارے پشین گوئی کرنا بہت مشکل ہے۔ ایئرمارشل ر شاہد لطیف نے کہا کہ رینجرز کی وجہ سے کراچی کے مسائل حل ہوئے لیکن جب بھی توسیع کا معاملہ ہوتا تو لیت و لعل سے کام لیا جاتا رہا۔ اس سے قبل کراچی میں ہر قسم کے جرائم ہو رہے تھے۔ فوجی عدالتوں کی راہ میں بھی رکاوٹیں کھڑی کی گئیں تھیں۔ ہمارے ملک میں اچکزئی جیسے لوگ ہیں جو کہتے ہیں ملک میں ہونے والی دہشت گردی میں را ملوث نہیں۔ پاکستان وہ دھرتی ہے جس کی خاطر بہت قربانیاں دی گئیں۔ ہماری اپنی صفوں میں بھی دشمن موجود ہیں بلوچستان میں ایسے لوگ بڑے بڑے عہدوں پر بیٹھے ہیں۔ بلیک واٹر کو جس نے ویزے دیے وہ حقانی تھے۔ پاکستان اپنی فضائی صلاحیت بڑھانے کی بھی کوشش کر رہا ہے۔ ماہر معاشیات شاہد حسن صدیقی نے کہا کہ موجودہ مالی سال میں ٹیکسوں کی وصولی کی صورتحال خراب ہے۔ جو شاہانہ اخراجات گزشتہ حکومت کرتی تھی وہی یہ کر رہی ہے۔ امیر طبقات کو مراعات دینے کا سلسلہ بھی جاری ہے عمل کرنے میں اور دعوے کرنے میں بڑا فرق ہے۔ اگر ٹیکسوں کا نظام بہتر نہ ہوا تو معیشت کمزور ہوگی۔ پٹرولیم مصنوعات کی قیمتیں بڑھنے سے مہنگائی کا طوفان آئے گا ابھی بجلی و گیس کے نرخ بھی بڑھیں گے۔ پی ٹی آئی کے رہنما ابراہیم خا ن نے کہا کہ وزیر خارجہ شاہ محمود قریشی تحریک انصاف کے درخشاں ستارے ہیں۔ ن لیگ کے پاس اب بات کرنے کا کوئی اخلاقی جواز نہیں تو مریم اورنگزیب الزامات لگا رہی ہیں۔