اسلام آباد‘ لاہور (مانیٹرنگ ڈیسک) تحریک انصاف کی حکومت نے یکم جولائی 2019ءسے جنوبی پنجاب کا انتظامی سیکرٹریٹ قائم کرنے کا اعلان کردیا۔ تحریک انصاف کی جانب سے جاری اعلامیے کے مطابق پنجاب کے2آئی جی اور2چیف سیکرٹری ہوں گے۔ جنوبیپنجاب کا چیف سیکرٹری اورآئی جی علیحدہ ہوگا۔ یکم جولائی سے جنوبی پنجاب کا انتظامی سیکرٹریٹ کام کرنا شروع کردے گا۔ جنوبی پنجاب کا ترقیاتی بجٹ بھی علیحدہ ہوگا۔ تحریک انصاف کی جانب سے کہا گیا ہے کہ حکومت جنوبی پنجاب کو ایک مکمل اور بااختیار صوبے کی حیثیت دینے کے لیے دن رات کوشاں ہے۔ خیال رہے کہ تحریک انصاف کی حکومت کی جانب سے جنوبی پنجاب صوبہ بنانے کا اعلان کیا گیا تھا۔ حکومت کا موقف ہے چونکہ ان کے پاس دوتہائی اکثریت نہیں ہے اس لئے وہ علیحدہ صوبہ بنانے کی پوزیشن میں نہیں ہیں، اگر اپوزیشن جماعتیں حکومت کا ساتھ دیں گی تو صوبہ علیحدہ بن جائے گا بصورت دیگر ابتدائی طور پر جنوبی پنجاب کا علیحدہ انتظامی سیکرٹریٹ قائم کردیا جائے گا جس کا آج (جمعہ کو) اعلان کردیا گیا ہے۔ پنجاب حکومت کا ایک اور بڑا اعلان‘ پنجاب میں 2آئی جی اور 2چیف سیکرٹری ہونگے۔ تحریک انصاف کے آفیشل ٹوئٹر کے ذریعے اعلان کیا گیا۔ ٹوئٹر پر جاری پیغام میں کہا گیا کہ جنوبی پنجاب کا اپنا چیف سیکرٹری اور آئی جی پولیس ہو گا۔ یکم جولائی سے جنوبی پنجاب کا علیحدہ انتظامی سیکرٹریٹ کام شروع کر دے گا۔
