ممبئی(ویب ڈیسک) بالی ووڈ اداکار ابھیشیک بچن نے ایشا امبانی کی شادی میں امیتابھ اور ایشوریہ رائے کے ویٹر بننے کی وجہ بتا دی۔بھارتی میڈیا کے مطابق بزنس ٹائیکون مکیش امبانی کی بیٹی کی شادی میں کئی ویڈیوز سوشل میڈیا پر وائرل ہوئیں جس میں امیتابھ بچن، ایشوریہ رائے،ابھیشیک بچن ، شاہ رخ خان اور بالی ووڈ کے مسٹر پر فیکشنسٹ عامر خان سمیت کئی دیگر اداکار بطور ویٹر مہمانوں کو کھانا فراہم کرتے ہوئے نظر آئے۔اداکاروں کے کھانا فراہم کرنے کی ویڈیو وائرل ہونے کے بعد سوشل میڈیا پر بحث کا ایک نیا سلسلہ شروع ہوگیا۔ مداح اپنے پرستاروں سے اس معاملے کی نوعیت کی وجہ جاننے کے لیے مختلف رائے کا اظہار کرتے رہے۔ معاملے کی وضاحت کے لیے ابھیشیک نے میدان میں آنے کا فیصلہ کیا، ایک مداح نے سوال پوچھا کہ عامر خان اور ابھیشیک بچن امبانی کی بیٹی کی شادی میں کھانا کیوں فراہم کر رہے ہیں؟ جس پر ابھیشیک بچن نے جواب دیتے ہوئے کہا کہ ’مہمانوں کو کھانا فراہم کرنا ایک روایت ہے جسے ’سجن گھوٹ‘ کہا جاتا ہے جس میں دلہن کے اہل خانہ دلہا والوں کی مہمان نوازی کرتے ہیں اور انہیں خود اپنے ہاتھوں سے کھانا فراہم کرتے ہیں‘۔واضح رہے کہ بھارت کے کھرب پتی تاجر مکیش امبانی کی صاحب زادی ایشا امبانی کی شادی کو دنیا کی مہنگی ترین شادی قرار دیا گیا ہے جس میں بالی ووڈ اسٹار سمیت دنیا بھر کی معروف شخصیات کے لیے 100 چارٹرڈ طیاروں اور سیکڑوں لگڑری گاڑیوں کے ساتھ ساتھ فائیو اسٹار ہوٹلز میں قیام کا انتظام کیا گیا تھا۔
