خبریں صحافت کے میدان میں اعلیٰ اقدار کا حامل اخبار

میرے لئے یہ امر باعث مسرت ہے کہ روزنامہ خبریں اپنی 26سالگرہ منا رہا ہے۔ میں خوشی کے اس موقع پر اس قافلے کے روح رواں جناب ضیا شاہد، امتنان شاہد اور روزنامہ خبریں کی تمام ٹیم کو دل کی گہرائیوں سے مبارکباد دیتا ہوں۔پی ٹی آئی حکومت وزیراعظم عمران خان کی قیادت میں قوم کو فرسودہ نظام سے نجات دلانے کے لئے شبانہ روز محنت کر رہی ہے۔ روزنامہ خبریں اور اس سے وابستہ تمام دوست احباب اورکارکنان کو اس سفر میں اپنا نظریاتی ساتھی سمجھتے ہیں۔ یہ تحریک ایک جماعت کی نہیں بلکہ پوری قوم کے دل کی تمنا ہے۔ اس مقصد کے حصول کے لئے ہم سب نے مل کر کام کرنا ہے کیونکہ پاکستان کے وجود پر لگے زخموں پر مرحم رکھنا، اسے سنوارنا، اس کی ترقی و خوشحالی کے لئے خدمات انجام دینا، ایک فرد کا نہیں پوری قوم کا فرض ہے۔ انشاءاللہ وزیراعظم عمران خان کی قیادت میں یہ قافلہ اس منزل تک پہنچ کر دم لے گا جو بابائے قوم قائداعظم محمد علی جناح اور شاعر مشرق علامہ اقبالؒ نے اس وطن عزیز کے لئے متعین کی تھی۔میں یہ بھی کہنا چاہوں گا کہ پی ٹی آئی حکومت آزادی اظہار، میڈیا کی آزادی اور میڈیا صنعت کے فروغ پر کامل یقین رکھتی ہے۔ ہماری خواہش اور کوشش ہے کہ جہاں ملک میں اصلاحات کا ایک جامع ایجنڈا کار فرما ہے، وہیں میڈیا صنعت، اخباری کارکنان اور قلم کے مزدوروں کے لئے سازگار ماحول کی فراہمی کو یقینی بنانے پر بھرپور توجہ مرکوز کی جائے۔ ان کے لئے سہولیات کی دستیابی کے ساتھ پیشہ وارانہ امور میں تربیت اور ترقی کے نئے امکانات پیدا کئے جائیں۔ انشاءاللہ میڈیا صنعت کے تعاون، رہنمائی اور مشاورت سے ہم بہتر اقدامات کی طرف بڑھ سکیں گے۔میں ایک بار پھر روزنامہ خبریں، اس سے وابستہ تمام شخصیات، کارکنان، قارئین کرام کو مبارکباد پیش کرتے ہوئے دُعا گو ہوں کہ یہ ادارہ مزید پھلے پھولے، برگ و بار لائے اور معاشرے سے ظلم کے خاتمے کے لئے اپنا یہ کردار اسی جذبے، ولولے اور لگن سے انجام دیتا چلا جائے۔