صاحبہ ہوئیں ریمبوپر مہربان ‘گھر میں ہیروئن بنا کررکھنے کا دعویٰ

لاہور (شوبزڈیسک) اداکارہ صاحبہ نے کہا ہے کہ شوبز میں شادیوں کی ناکامی کی بڑی وجہ یہ ہے کہ اداکارہ پر شادی کے بعد پابندیاں عائد کر دی جاتی ہیں اور اس کو زبردستی اس بات پر مجبور کیا جاتا ہے کہ وہ کسی سے کوئی رابطہ نہ رکھے اسی وجہ سے میاں بیوی کے درمیان ایک تناﺅ کی کیفیت پیدا ہوتی ہے جس کا نتیجہ طلاق کی صورت میں سامنے آتا ہے ۔ انہوں نے خصوصی گفتگو کرتے ہوئے کہا کہ خدا کا شکر ہے کہ ریمبو سے شادی کی اور انہوں نے مجھے گھر میں بھی ہیروئن بنا کر رکھا اور میں انکی چھوٹی بڑی باتوں کو نظر انداز کرتی ہوں ،ہم ایک دوسرے کو اچھی طرح سمجھنے میں کامیاب ہو گئے اور یہی ہماری شادی کی کامیابی کی بڑی وجہ ہے ۔ انہوں نے کہا کہ میں ان تمام اداکاروں سے اپیل کرتی ہوں کہ وہ بھی شادی کے بعد اپنی بیویوں کو گھر میں ہیروئن بنا کر رکھیں ۔انہوں نے کہاکہ ریمبو گھریلو امور میں میرے ساتھ ہاتھ بٹاتے ہیں مگر انکی ایک بری عادت بھی ہے کہ وہ گھر کی تمام خراب چیزوں کی مرمت خود ہی شروع کر دیتے ہیں ،پنکھے سے لیکر فریج تک ہر چیز ٹھیک کرنے کی کوشش کرتے ہیں ۔صاحبہ نے کہا کہ ریمبو کو بات بات پر غصہ آتا ہے مگر مجھ پر غصے کی کیفیت کم کم طاری ہوتی ہے مگر جب مجھے غصہ آتا ہے تو پھر وہ کئی دنوں تک برقرار رہتا ہے ۔