اسرائیلی طیارے کی پاکستان آمد ، کتنی حقیقت کتنا فسانہ ، سنسنی خیز انکشافات

اسلام آباد(ویب ڈیسک ) سول ایوی ایشن اتھارٹی (سی اے اے) نے اسرائیلی طیارے کی پاکستان آمد کی خبروں کی تردید کرتے ہوئے انہیں بے بنیاد قرار دے دیا۔حکومت کے آفیشل ٹوئٹر اکاو¿نٹ پر جاری کیے گئے پیغام میں سول ایوی ایشن کے حوالے سے کہا گیا کہ کسی اسرائیلی طیارے کی پاکستان کے کسی بھی ایئرپورٹ پر آمد کی افواہ میں کوئی صداقت نہیں۔واضح رہے کہ 25 اکتوبر کو ایوی شارف (Avi Scharf) نامی ایک اسرائیلی صحافی نے اپنے ٹوئٹر پیغام میں کہا تھا کہ ایک اسرائیلی طیارہ پاکستان آیا، تاہم وہ طیارہ دارالحکومت تل ابیب سے براہ راست اسلام آباد نہیں پہنچا بلکہ طیارے کے پائلٹ نے چالاکی کرتے ہوئے پہلے اسے 5 منٹ کے لیے عمان میں لینڈ کروایا اور پھر وہاں سے اسلام آباد کے لیے اڑان بھری۔اس حوالے سے برطانوی نشریاتی ادارے بی بی سی نے اپنی رپورٹ میں بتایا کہ گلوبل ایکسپریس ایکس آر ایس نامی مذکورہ طیارہ اسرائیل میں رجسٹرڈ نہیں تھا اور اسے کینیڈا کی طیارہ ساز کمپنی بمبار ڈیئر نے بنایا تھا۔دوسری جانب اسرائیلی صحافی کی ٹوئیٹ کے بعد سوشل میڈیا پر تبصروں اور افواہوں کا ایک سیلاب آگیا اور سابق وزیر داخلہ اور لیگی رہنما احسن اقبال نے حکومت سے وضاحت کا مطالبہ کر ڈالا۔جس کے جواب میں وفاقی وزیر اطلاعات فواد چوہدری نے احسن اقبال کو پاکستان کی ‘جعلی فکر’ نہ کرنے کا مشورہ دیتے ہوئے کہا کہ ہم نہ مودی سے خفیہ مذاکرات کریں گے اور نہ ہی اسرائیل سے، ملک محفوظ ہاتھوں میں ہے۔بعدازاں جعلی خبروں کی روک تھام کے لیے بنائے گئے سرکاری ٹوئٹر اکاو¿نٹ پر بھی اسرائیلی طیارے کی آمد کی رپورٹس کو جعلی قرار دے دیا گیا۔وزارت اطلاعات کے ٹوئٹر اکاو¿نٹ ‘فیک نیوز بسٹر’ پر پوسٹ کی گئی ٹوئیٹ میں کہا گیا کہ ‘جعلی خبریں پھیلانا صحافتی اخلاقیات کے خلاف ہے۔ پاکستان کے دشمنوں کی جانب سے پھیلائی گئی اس بے بنیاد خبر کا مقصد کشمیریوں کے یوم سیاہ کے موقع پر مقبوضہ کشمیر میں جاری بھارتی مظالم کو بے نقاب کرنے سے روکنے کی کوشش ہے۔