5 لیگی اراکین اسمبلی کی بغاوت کا دعویٰ

لاہور(ویب ڈیسک ) وزیر اطلاعات پنجاب فیاض الحسن چوہان نے 5 لیگی اراکین اسمبلی کی بغاوت کا دعویٰ کیا ہے۔ فیاض الحسن چوہان کا دعویٰ ہے کہ ن لیگ میں فارورڈ بلاک بن چکا ہے، مجھ سے 5 لیگی اراکین اسمبلی تحریک انصاف میں شمولیت کیلئے رابطہ کر چکے ہیں۔ تفصیلات کے مطابق صوبائی وزیر اطلاعات پنجاب فیاض الحسن چوہان نے کہا ہے کہ ن لیگ کے اندر فارورڈ بلاک بن چکا ہے۔وزیر اطلاعات پنجاب فیاض الحسن چوہان کا کہنا ہے کہ مجھ سے 5 لیگی اراکین اسمبلی تحریک انصاف میں شمولیت کیلئے رابطہ کر چکے ہیں۔ آنے والے دنوں میں یہ لیگی اراکین پنجاب اسمبلی تحریک انصاف میں شامل ہو جائیں گے۔ فیاض الحسن چوہان کا مزید کہنا ہے کہ پنجاب اسمبلی میں ہونے والی پر بننے والی کمیٹی پنجاب اسمبلی میں توڑ پھوڑ کے واقعے کی مکمل تحقیق کرے گی۔کمیٹی میں مسلم لیگ (ن) کے ارکان بھی شامل ہیں۔ صوبائی وزیر فیاض الحسن چوہان نے کہا ہے کہ حمزہ شہباز سے درخواست ہے کہ والد صاحب سے مشورہ کر لیں۔ حمزہ شہباز کے والد قومی اسمبلی میں اپوزیشن لیڈر اور وہ خود پنجاب اسمبلی میں۔ انہوں نے کہا کہ حمزہ شہباز کو مشورہ ہے وہ دوپہر میں آیا کریں تاکہ ارکان کیساتھ دھوپ میں کھڑے ہو سکیں۔ حمزہ شہباز صاحب عمران خان اور فیاض چوہان کی تربیت کی فکر نہ کریں بلکہ اسلامیات کے ٹیچر کو بلا کر اپنی اور اپنے ارکان کی تربیت کریں یہ لوگ اسمبلی میں توڑ پھوڑ کی من پسند وڈیو بنا کر لے آئیں تو کیا کہہ سکتا ہوں۔انہوں نے کہاکہ میڈیا سمیت سب نے دیکھا کہ پنجاب اسمبلی میں اس روز کیا ہوا۔ موسم ٹھنڈا ہوتا ہے تو حمزہ احتجاج میں آجاتے ہیں۔ (ن) لیگ کی اخلاقیات کا عالم یہ ہے ڈھائی ہزار روپے کیلئے حاضریاں لگا رہے ہیں۔ میں حمزہ شہباز سے درخواست کرتا ہوں کہ ارکان سمیت اجلاس میں شریک ہوا کریں۔