ملک سابقہ حکومتوں کی غلط پالیسیوں کے باعث قرضے میں پھنسا: صداقت عباسی ، سعودی عرب میں وزیراعظم عمران خان کو جو پذیرانی ملی وہ شاید کسی کو نہیں ملی، جنرل (ر) امجد شعیب، آئی ایم ایف کے چکر سے نکلنا مشکل ہے: تجزیہ کار کی چینل ۵ کے پروگرام ” نیوز ایٹ 7“ میں گفتگو

لاہور (مانیٹرنگ ڈیسک) تحریک انصاف کے رہنماءصداقت عباسی نے کہا ہے کہ وزیراعظم عمران خان باہر اگر قرضہ لینے گئے ہیں تو اپنے لئے نہیں قوم کے لئے گئے۔ ملک اس نہج پر گزشتہ حکومتوں کی غلط پالیسیوں کے باعث پہنچا۔ چینل فائیو کے پروگرام نیوز ایٹ 7میں گفتگو کرتے ہوئے انہوں نے کہا کہ آئی ایم ایف کی شرائط بہت سخت ہیں وزیراعظم کی کوشش ہے یہ آپشن کم سے کم استعمال کیا جائے اور باہر سے سرمایہ کاری لائی جائے۔ حکومت نے لگژری اشیاءپر ٹیکس لگایا۔ ہاﺅسنگ سکیم سے پاکستان کی معیشت بہتر اور روزگار ملے گا۔ گزشتہ حکومت نے میٹرو پر سبسڈی دے کر غریب عوام پر ٹیکس کا بوجھ ڈالا۔ وزیراعظم جو کر رہے ہیں ملک وقوم کے بہتر مستقبل کے لئے کر رہے ہیں۔ دفاعی تجزیہ کار جنرل (ر) امجد شعیب نے کہا کہ وزیراعظم کا دوسرا دورہ سعودی عرب، سعودی کی دعوت پر ہوا۔ دورے میں عمران خان نے پاکستان کا موقف دنیا کو بتایا۔ میرے خیال میں وزیراعظم کو سعودی عرب سرمایہ کاروں کے لئے ایک پیکج لے کر جانا چاہئے تھا بہرحال وزیراعظم کے دورے سے فائدہ ہو گا۔ سعودی نے بارہا پاکستان کی مدد کی۔ سعودی میں جو پذیرائی عمران خان کو ملی وہ شاید کسی کو نہیں ملی۔ سعودی صحافی جمال خشوقجی کا قتل بہت گھناﺅنا فعل ہے، قتل منصوبہ بندی کے تحت لگتا ہے۔ میرے خیال میں اسرائیل امریکہ پر دباﺅ ڈال کر سعودی معاملات کو سلجھانے کی کوشش کرے گا ۔ انہوں نے کہا آئی ایم ایف کے چکر سے نکلنا بہت مشکل ہوتا ہے۔ آئی ایم ایف کے پاس کم سے کم جانے کی پالیسی موجودہ حکومت کی کامیاب پالیسی ہے۔ ریگولیٹری ڈیوٹی سے ملک کو آمدنی ہوگی بجلی گیس کی چوری روکنے سے مہنگائی کنٹرول ہو گی۔