تحریک عدم اعتماد سے نپٹنے کیلئے تیاریاں مکمل

اسلام آباد (مانیٹرنگ ڈیسک) اپوزیشن کی جانب سے تحریک عدم اعتماد کے اشارے پر حکومت اور اداروں نے اپنی حکمت عملی تیار کر لی۔ نجی ٹی وی کے مطابق اپوزیشن کے گٹھ جوڑ کے خلاف حکومت نے کسی دباﺅ میں نہ آنے کا فیصلہ کر لیا۔ حکومت اپوزیشن کے خلاف جارحانہ رویہ اختیار کرے گی۔ حکومت نے نیب اور ایف آئی اے سے سیاسی رہنماﺅں کے خلاف کیسز کی فہرستیں مانگ لیں جو حکومت کو بھجوا دی گئی ہیں۔ حکومت نے ان کیسز کا بغور جائزہ لیا ہے۔ پیپلزپارٹی کے خلاف بڑے پیمانے پر کریک ڈاﺅن کی تیاریاں بھی مکمل کر لی گئیں۔ اہم رہنماﺅں کی گرفتاریوں کیلئے نیب اور ایف آئی اے کو اہم ٹاسک دے دیئے گئے۔ سابق صدر آصف زرداری کی گرفتاری بھی رواں ہفتے عمل میں آ سکتی ہے۔ پہلے مرحلے میں حکومت کی جانب سے سندھ میں پکڑدھکڑ کا سلسلہ شروع ہو گا۔ پیپلزپارٹی کی اہم شخصیات کی گرفتاری کے بعد انہیں وعدہ معاف گواہ بنایا جائے گا۔ سابق صدر آصف علی زرداری کے خلاف ان کے قریبی رفقاءکو بطور ٹول استعمال کیا جائے گا۔ حکومت کی جانب سے جارحانہ اقدامات کی تیاریاں مکمل کر لی گئی ہیں۔