موجودہ پی سی بی انتظامیہ کو کام کرنے دیا جائے ،صلاح

کراچی(یواین پی)قومی کرکٹ ٹیم کے سابق چیف سلیکٹر صلاح الدین صلو نے نئی حکومت سے درخواست کی ہے کہ استحکام کی خاطر موجودہ پی سی بی انتظامیہ کو کام کرنے دیا جائے۔ انہوں نے امید ظاہر کی کہ تحریک انصاف کی حکومت بورڈ کے کاموں میں استحکام کیلئے پالیسیوں کا تسلسل جاری رکھے گی۔ میڈیا سے گفتگو میں ان کا کہنا تھا کہ ملک میں تشکیل پانے والی نئی حکومت اداروں کی مضبوطی کیلئے پاکستان کرکٹ بورڈ میں تسلسل کی پالیسی اپنائے جس سے کھیل نئی بلندیوں پر جا پہنچے گا۔ انہوں نے پی ٹی آئی کی حکومت کو خوش آمدید کہتے ہوئے توقع ظاہر کی کہ عمران خان سابق کھلاڑی،کپتان اور اپنے وقت کے مشہور آل راو¿نڈر کی حیثیت سے موجودہ پی سی بی انتظامیہ کی سپورٹ کریں گے جس نے معجزاتی طور پر ملک میں انٹرنیشنل کرکٹ کی سرگرمیاں بحال کیں اور قومی ٹیم کی کارکردگی میں بھی نمایاں بہتری پیدا ہوئی۔سابق چیف سلیکٹر نے انتخابات میں کامیابی کے بعد عمران خان کی تقریر کو سراہتے ہوئے کہا کہ انہوں نے ماضی کے اختلافات کو فراموش کرتے ہوئے ملکی اداروں کی مضبوطی کا عزم ظاہر کیا اور اسی تناظر میں دیکھا جائے تو نجم سیٹھی کی پاکستان کرکٹ کی بہتری کیلئے انتھک محنت کا نتیجہ سب کے سامنے ہے کہ پی ایس ایل سے پاکستان کو نئی صلاحیت میسر آئی جبکہ پاکستانی لیگ بھی عالمی سطح پر ایک برانڈ کے طور پر فخر کا باعث بن گئی۔ انہوں نے نئی حکومت سے درخواست کی کہ پی سی بی کی موجودہ انتظامیہ کی جانب سے کئے جانے والے اقدامات کو ڈی ریل نہ کیا جائے جس سے پاکستان کرکٹ کی ترقی متاثر ہوگی۔