ہر طر ف پانی ہی پانی ، بارش نے تباہی مچا دی

لاہور (کرائم رپورٹر) لاہور میں بارش نے تباہی مچا دی، کرنٹ لگنے سے 6 افراد ہلاک، درجنوں زخمی ہوگئے، دفاتروں میں حاضری کم، شہر تالاب کا منظر پیش کرنے لگا، 200 سے زائد فیڈر ٹرپ، رات 12 بجے سے بجلی غائب،170 ملی میٹر بارش نے ہر طرف پانی ہی پانی کر دیا۔ تفصیلات کے مطابق گزشتہ رات طوفان اور بارش نے ہر کسی کو خوفزدہ کر دیا، تیز آندھی سے سائن بورڈ گر گئے۔ درخت اکھڑ گئے، کئی گھروں کی چھتیں اڑ گئیں۔ مسلسل بارش کے باعث شہر بھر میں 200 سے زائد فیڈر ٹرپ کر گئے جس سے شہر کا بڑا حصہ اندھیرے میں ڈوب گیا۔ والٹن، اچھرہ، ہربنس پورہ، گڑھی شاہو، شمالی لاہور، صدر، کینٹ، جوڑا پل، مصری شاہ ،مزنگ، بلال گنج، کاہنہ ، چونگی امرسدھو، دھرم پورہ، شاہدرہ، بادامی باغ ، چائنہ سکیم، بھوگیوال، جانی پورہ کوٹ خواجہ سعید، ٹھوکر نیاز بیگ، اقبال ٹاﺅن، اعوان ٹاﺅن، کھاڑک، سبزہ زار، ماڈل ٹاﺅن سے ملحقہ آبادیاں، لکشمی، عابد مارکیٹ سمیت دیگر علاقوں میں رات سے بجلی بند جبکہ بارش کا پانی نہ صرف سڑکوں پر کھڑا رہا جبکہ نشیبی علاقوں کے گھروں میں بھی داخل ہوگیا۔ بارش کے باعث کئی حادثات ہوئے جن میں قیمتی جانوں کا ضیاع ہوا۔ تھانہ ساندہ کا ڈرائیور امانت علی ساتھی رضا کار شاہ زیب بٹ کے ہمراہ ناکہ سے واپس آ رہا تھا کہ راجگڑھ کے قریب بجلی کی تاریں پانی میں گرنے کے باعث کرنٹ لگ گیا جس کے نتیجہ میں دونوں جوان تڑپ تڑپ کر دم توڑ گئے۔ موقع پر موجود لوگوں نے بچانے کی بھرپور کوشش کی مگر کامیاب نہ ہوسکے، تاہم ریسکیو کے عملہ نے دونوں کی نعشیں پانی سے نکال کر مردہ خانہ جمع کروا دیں۔ مزنگ کے علاقہ قرطبہ چوک کے قریب اکبر نامی نوجوان کرنٹ لگنے سے جاں بحق ہوگیا۔ شاہدرہ میں 25 نمبر سٹاپ پر اویس نامی لڑکا بارش کے دوران کرنٹ لگنے سے دم توڑ گیا، متوفی کی نعش گھر پہنچنے پر کہرام برپا ہوگیا۔ ٹبی سٹی کے علاقہ میں رات گئے موسلادھار بارش کے دوران بوسیدہ مکان کی چھت زوردار دھماکہ سے گر گئی جس کے نتیجہ میں 30 سالہ عباس اور 18 سالہ عمر ملبہ تلے دب کر ہلاک ہوگئے۔ ٹاﺅن شپ میں چھت گرنے سے دو بچوں سمیت تین افراد شدید زخمی ہوگئے۔ لوئر مال تھانے کے سامنے آج صبح ٹرک الٹنے سے تین افراد زخمی جبکہ ٹریفک کانظام درہم برہم ہوگیا۔ بارش کا سلسلہ نہ صرف لاہور بلکہ پنجاب کے دیگر شہروں میں بھی رات سے جاری ہے ۔ مریدکے، سیالکوٹ، نارووال، شیخوپورہ، مانگامنڈی، گجرات، گوجرانوالہ، قصور، فیصل آباد، اسلام آباد، راولپنڈی سمیت پنجاب کے تمام شہروں میں مسلسل بارش ہو رہی ہے۔ آسمان سے گھنگور گھٹاﺅں نے دن کو رات بنا دیا۔ محکمہ موسمیات کے مطابق بارش کا سلسلہ آئندہ دو روز روز تک جاری رہے گا۔ ایئرپورٹ کے علاقہ میں 48 ملی میٹر بارش ہوئی جس سے درجنوں پروازیں متاثر ہوئیں۔ متعدد کو لاہور اتارنے کے بجائے دوسرے شہروں کا رخ کروایا گیا۔