آبی بحران سے زراعت تباہ ، کالا باغ سمیت چھوٹے بڑے ڈیمز تعمیر کیے جائیں: کسان رہنما

رحیم یار خان (سپیشل رپورٹر) پاکستان میں پانی کا بحران زراعت کو تباہی کی طرف لے جا رہا ہے۔ چیف جسٹس آف پاکستان کی طرف سے کالا باغ ڈیم کی تعمیر کیلئے اسٹیک ہولڈرز کو طلب کرنا اور کومنٹس حوصلہ افزا ہیں۔ آصف علی زرداری کے بعد اب شہباز شریف کی طرف سے کالا باغ ڈیم نہ بنانے کا اعلان کرنا‘ملک کی معیشت اور زراعت تباہ کرنے کے مترادف ہے۔ ان خیالات کا اظہار ایگری فورم پاکستان اور کسان اتحادکے رہنماﺅں نے ”خبریں“ فورم میں گفتگو کرتے ہوئے کیا۔ ایگری فورم پاکستان رجسٹرڈ پنجاب کے صدر چودھری احمد علی اختر‘ ضلعی صدر چودھری حبیب اللہ‘ جنرل سیکرٹری رشید احمد‘ تحصیل رحیم یارخان کے صدر محمد اقبال کمبوہ‘ تحصیل صادق آباد کے صدر احمد اکرام چودھری‘ کسان اتحاد بہاولپور ڈویژن کے صدر میاں فیصل منصور اختر‘ ضلعی آرگنائزر راجہ محمد خان‘ امتیاز احمد‘ جام شہزاد شکور اور تحصیل صادق آباد کے چیئرمین محمود الحسن چودھری نے کہا ہے کہ پاکستان اس وقت پانی کے شدید بحران سے دوچار ہے۔ ماہرین کے خیال کے مطابق 2025ءتک پاکستان کی زرعی معیشت شدید خطرات سے دوچار ہو جائے گی۔ انہوں نے کہا اس سال چھ ماہ تک نہریں بند رہنے کی وجہ سے لوگ پانی کی ایک ایک بوند بوند کو ترس گئے ہیں۔ انسانوں اور جانوروں کے پینے کے لئے پانی دس دس میل دور سے لانا پڑتا ہے۔ جانوروں کا چارہ کاشت نہ کیا جا سکا ایسے دیہاتی خاندان جن کا ذریعہ روزگار لائیوسٹاک ہے گائے بھینسیں بکریاں پال کر دودھ فروخت کرنا ہے‘ کنگال ہو گئے اور اپنے مال مویشی فروخت کرنے پر مجبور ہو گئے۔ پانی نہ ہونے کی وجہ سے کپاس اور گنے کی بروقت کاشت نہیں کی جا سکی جس سے کاشتکاروں کو ناقابل تلافی نقصان ہوا ہے۔ انہوں نے کہا ہے کہ ٹھیکیداروں نے زمین کے مالکان کو زمین ٹھیکے پر لینے سے معذرت کر لی ہے۔ کھیت مزدور بے روزگار ہورہے ہیں۔ اگر صورت حال یہی رہی تو خدانخواستہ ہماری سونا اگلتی زمینیں بنجر ہو سکتی ہیں۔ پھلوں سے لدے باغات تباہ ہو سکتے ہیں کیونکہ ہندوستان ہمارے دریاو¿ں پر دھڑا دھڑ ڈیم تعمیر کرکے ہمارا پانی اپنی زراعت کیلئے استعمال کر رہا ہے مگر ہمارے حکمران ہندوستان کو ڈیمز بنانے سے روکنے میں ناکام رہے ہیں۔ دوسری طرف پاکستان میں ایوب حکومت کی طرف سے منگلا اور تربیلا ڈیم بنانے کے بعد پیپلز پارٹی‘ مسلم لیگ (ن)‘ اور (ق) لیگ نے حکومتوں کے مزے تو لوٹے مگر کوئی ڈیم بھی تعمیر نہ کیا۔ پیپلز پارٹی کے آخری دور میں آصف علی زرداری نے کالاباغ ڈیم کو تعمیر نہ کرنے کا اعلان کر کے زرعی معیشت خصوصاً کسان طبقے پر بجلی گرا دی اب مسلم لیگ (ن) کے صدر میاں شہباز شریف نے کراچی میں کالا باغ ڈیم تعمیر نہ کرنے کا اعلان کر کے محب وطن پاکستانیوں کے جذبات کو مجروح کر دیا ہے۔ زراعت بچاﺅ تحریک میں شامل کسان تنظیموں ایگری فورم پاکستان رجسٹرڈ اور کسان اتحاد کے رہنماو¿ں نے مطالبہ کیا کہ چاروں صوبوں کے اتفاق رائے سے کالا باغ ڈیم اور بھاشا ڈیم سمیت بڑے اور چھوٹے ڈیمز تعمیر کئے جائیں۔
کسان رہنما