ماسکو (اے پی پی) اکیسواں ورلڈ کپ فٹ بال ٹورنامنٹ 2018ءاختتامی مرحلے کی طرف گامزن ہے،۔ فیفا ورلڈ کپ کا پہلا پری کوارٹر فائنل میچ (آج) ہفتہ کو فرانس اور ارجنٹائن کی ٹیموں کے درمیان کھیلا جائیگا جو پاکستان کے معیاری وقت کے مطابق رات7 بجے شروع ہوگا جبکہ دوسرا پری کوارٹر فائنل میچ یوروگوئے اور پرتگال کی ٹیموں کے درمیان کھیلا جائیگا یہ میچ پاکستان کے معیاری وقت کے مطابق رات 11بجے شروع ہوگا ۔کل ماسکوکے لوزنیکی سٹیڈیم میں ہونیوالے پہلے میچ میں سپین اورمیزبان روس آمنے سامنے ہونگے۔دوسرے میچ میں نزنی نوگروڈمیں کروشیا اورڈنمارک نبردآزماہونگے۔ عالمی چیمپئن جرمنی کی ٹیم ٹائٹل چھوڑ کر وطن واپس پہنچ گئی۔ تفصیلات کے مطابق میگا ایونٹ کا پری کوارٹر فائنل لائن اپ مکمل ہوگیا، پری کوارٹر فائنل مرحلہ (آج) ہفتہ سے شروع ہوگا۔ فرانس، ارجنٹائن، برازیل، سپین، میزبان روس، میکسیکو، سویڈن، سوئٹزرلینڈ، کروشیا، ڈنمارک، یوروگوئے ، جاپان، بیلجیئم، انگلینڈ، کولمبیا اور پرتگال کی ٹیمیں میگا ایونٹ کے پری کوارٹر فائنل میں پہنچ چکی ہیں۔ روس میں عالمی کپ فٹ بال ٹورنامنٹ میں کانٹے دار مقابلوں کا سلسلہ اپنے عروج پر پہنچ گیا ہے جس میں اب تک بڑی ٹیموں کی مایوس کن کارکردگی سامنے آئی ہے۔ واضح رہے کہ میگا ایونٹ کا کوارٹر فائنل مرحلہ 6 جولائی سے شروع ہوگا، میگا ایونٹ کا پہلا سیمی فائنل میچ 10 جولائی کو کھیلا جائیگا، دوسرا سیمی فائنل میچ 11 جولائی کو کھیلا جائیگا، تیسری پوزیشن کے لئے میچ 14 جولائی کو کھیلا جائیگا۔ میگا ایونٹ کے چیمپئن کا فیصلہ 15 جولائی کو ہوگا۔
