رمضان المبارک کے بعد بھی تقوی اختیارکیا جائے،علامہ رشید ترابی چاند رات گزرتے ہی روٹین پر آنا اچھی بات نہیں ،علامہ اسامہ بخاری معروف علماءکرام کی چینل ۵ کی خصوصی رمضان ٹرانسمیشن میں میز بان آمنہ کاردار سے گفتگو

لاہور(مانیٹرنگ ڈیسک)چینل فائیو کے پروگرام مرحبا رمضان میں بتایا گیا کہ تمام مسلمانوں کو کوشش کرنی اہئے کہ رمضان کے بعد بھی گناہوں سے بچنے کی حتی الامکان کوشش کریں اور تقویٰ اختیار کریں۔علامہ اسامہ بخاری نے کہا کہ ہم رمضان المبارک میں تو حاجی نمازی بن جاتے ہیں لیکن جیسے ہی رمضان گزرتا ہے چاند رات آتی ہے ہم دوبارہ اپنی روٹین پر آ جاتے ہیں۔حالانکہ رمضان المبارک کا مقصد تقویٰ کا حصول ہے صرف بھوکا پیاس رہنا مقصد نہیں۔رب صرف ماہ رمضان میں نہیں پو را سال بلکہ پوری زندگی ہمارے ہر ہر عمل کو دیکھتا ہے اس سے کوئی شے چاہے وہ مخفی ہو یا ظاہر ہو ڈھکی چھپی نہیں۔ریاکاری شرک اصغر ہے جو دکھاوے کی عبادت کرتا ہے اس کے لئے سخت سزا ہے لہذا ریاکاری سے بچنا چاہئے۔چاند نظر آتے ہی بچے بڑے خواتین بازاروں کا رخ کر لیتے ہیں اورفجر تک شاپنگ ہی کرتے رہتے ہیں۔ہم نے یورپین تہذیب سے بہت کچھ سیکھا لیکن ہمارا اپنا کلچر بہت اچھاہے۔ہمیں چاہئے عید کی خوشیوں میں دوسرے لوگوں کو بھی شامل کریں ان کی مدد اس طرح کریں دائیں ہاتھ سے دیں تو بائیں کو پتہ نہ چلے بائیں سے دیں تو دائیں کو پتہ نہیں چلے۔ویسے بھی زکوة ہم پر فرض ہے ہم زکوة دے کر کسی پر احسان نہیں کرتے یہ تو قرض حسنہ ہے جو ہم اللہ کے نام پردیتے ہیں اور اللہ ہمیں کئی گنا بڑھا کر لوٹاتا ہے ہیں اس میں کنجوسی سے کام نہیں لینا چاہئے۔علامہ محمد رشید ترابی نے بتایا کہ اللہ پاک قرآن کریم میں فرماتے ہیں ”اے ایمان والوں تم پر روزے فرض کئے گئے ہیں جیسے کہ تم سے پہلے لوگوں پر فرض کئے گئے تھے تاکہ تم متقی اور پرہیز گار بن سکو“اب دیکھنا یہ ہے ہم روزے کا اصل مقصد حاصل کرتے ہیں کہ نہیں اس کے لئے ہمیں اپنے روزمرہ کے معمولات کا جائزہ لینے کی ضرورت ہے کیا ہم اللہ پاک کی اطاعت کرتے ہیں یا ایک ماہ روزے رکھ کر باقی گیارہ مہینے گناہوں میں مبتلا رہتے ہیں۔ہمیں چاہئے اپنی زندگی کا احاطہ کریں اور اپنے اعمال کی اصلاح کریں بے اعتدالی دوسروں کی حق تلفی و دل آزاری سے بچیں۔ہمیں کوشش کرنی چاہئے صرف باتیں نہیں عمل بھی کریں۔روزہ صرف کھانے پینے سے رکنے کا نام نہیں،زبان کا بھی روزہ ہے آنکھ کا بھی روزہ ہے ہاتھ کا بھی پاﺅں کا بھی کردار کا بھی اور گفتار کا بھی روزہ ہے۔