5 ویں شادی پر 4 بیویوں کا شوہر کیخلاف اتحاد ، بڑا کام کر ڈالا

لاہور (خصوصی رپورٹ) سیشن کورٹ میں ایک ہی شوہر کی چار بیویوں نے مل کر پانچویں شادی کرنے پر شوہر کیخلاف فراڈ کیس دائر کردیا، ایڈیشنل سیشن جج عارف مجاہد نے کیس کی سماعت کرتے ہوئے تھانہ داتا دربار کے ایس ایچ او سے 7جون کو رپورٹ طلب کرلی ہے۔ سیشن کورٹ میں ایک ہی شوہر کی چار بیویوں نے مل کر پانچویں شادی کرنے پر اپنے شوہر کیخلاف فراڈ کیس دائرکردیا، سیشن کورٹ میں ایک بہت ہی دلچسپ نوعیت کا کیس دیکھنے میں آیا جب 4بیویاں عدالت پہنچ گئیں، عدالت میں اپنے شوہر عرفان رسول نامی شخص جوکہ ریلوے کالونی کارہائشی ہے، کیخلاف فراڈ کیس دائرکردیا۔ درخواست گزاران میں طیبہ، سائرہ، صائمہ اور ارم شامل تھیں جنہوں نے ایڈووکیٹ عبدالرحمن کی وساطت سے اندراج مقدمہ کی درخواست دائر کی، شوہر نامداد کی دوسرے نمبر کی بیوی صائمہ نے اپنے جذبات کا اظہار کرتے ہوئے کھلے دل سے اس بات کا بھی اظہار کردیا کہ ہمارا شوہر شادیاں کرنے والے گینگ کیساتھ ملا ہوا ہے جو شادیوں کے نام پر لڑکیوں کی زندگیاں تباہ کرتا ہے اور شادی کرکے ان سے زیورات وغیرہ بھی ہتھیا لیتا ہے، ہمارا شوہر اب پانچویں شادی کرنے لگا تھا اور تو اور وہ شادی سے پہلے وہ اپنے آپ کو کنوارہ ظاہر کرواتا ہے، پھر جال میں پھنسا کر شادی کرلیتا ہے اور ان سے اپنے مطالبات پورے کرواتا ہے جس کی بناءپر ہم اس کیخلاف فراڈ کا مقدمہ درج کروانا چاہتی ہیں۔