معین تمام غیر ملکی سٹارزکو پاکستان میں دیکھنے کے خواہشمند

شارجہ(یو این پی)پی ایس ایل کی فرنچائز کوئٹہ گلیڈی ایٹرز کے کوچ معین خان کی خواہش ہے کہ پاکستان میں ہونے والے میچز میں بھی تمام غیر ملکی اہم کرکٹرز بھرپور شرکت کریں کیونکہ انہیں خدشہ ہے کہ ایسا نہ ہونے پر ایک بار پھر انہیں ٹائٹل سے محرومی کا سامنا رہے گا۔ میڈیاسے خصوصی گفتگو میں ان کا کہنا تھا کہ اس مرتبہ تین میچز پاکستان میں ہونے ہیں لہٰذا تمام ٹیموں کے اہم غیر ملکی کرکٹرز کی موجودگی ضروری ہے۔ ان کا یو این پی سے کہنا تھا کہ دو مرتبہ فائنل میں پہنچنے کے باوجود ٹائٹل نہ جیتنے کی سب سے بڑی وجہ غیر ملکی کرکٹرز کا پاکستان آ کر کھیلنے سے انکار تھا لیکن انہیں پوری امید ہے کہ اس بار ایسا نہیں ہوگا کیونکہ تمام غیر ملکی کرکٹرز کی جانب سے مثبت رویہ دیکھنے میں آرہا ہے کیونکہ پاکستان میں اب سیکیورٹی کی صورتحال کافی بہتر ہو گئی ہے۔ معین خان نے امید ظاہر کی کہ اس بار کوئٹہ گلیڈی ایٹرز کراچی میں ہونے والے فائنل کا حصہ ہوگی اور ٹائٹل بھی جیت جائے گی۔ سابق قومی کپتان کا کہنا تھا کہ کوئٹہ گلیڈی ایٹرز کے تمام کھلاڑی فٹ اور انجری مسائل سے پاک ہیں جبکہ دوسری ٹیمیں انجریز کی مشکلات سے دوچار ہیں لیکن انہوں نے اپنے کھلاڑیوں کو تاکید کی ہے کہ وہ کسی بھی مرحلے پر تن آسانی میں مبتلا نہ ہوں اور ملنے والے تمام مواقع کا بھرپور فائدہ اٹھاتے ہوئے فتوحات کا سلسلہ دراز کرتے رہیں کیونکہ شارٹ فارمیٹ میں صورت حال تبدیل ہوتے دیر نہیں لگتی ہے اور انہیں پوری توقع ہے کہ اس بار ٹائٹل ان کا ہی ہوگا۔