الوداع شوبز، بس اب اور نہیں ۔۔۔ اداکارہ عائشہ خان نے سوشل میڈیا پر ایسا اعلان کر دیا کہ مداح حیرت زدہ رہ گئے

لاہور(شوبز ڈیسک) پاکستانی شوبز کی مایہ ناز اداکارہ و ماڈل عائشہ خان نے شوبز انڈسٹری کو چھوڑنے کا اعلان کر دیا۔ اداکارہ کا یہ اعلان سوشل میڈیا پر ان کی پوسٹ کے ذریعے سامنے آیا۔ تفصیلات کے مطابق عائشہ خان نے اپنی پوسٹ میں اپنے مداحوں اور چاہنے والوں سمیت دوستوں کا بھی شکریہ ادا کیا اور ساتھ ہی سب کو درخواست کی کہ انہیں ہمیشہ دعاﺅں میں یاد رکھا جائے۔عائشہ خان نے پوسٹ میں لکھا کہ انہوں نے سوچ سمجھ کے بعد اپنی خوشی سے میڈیا انڈسٹری کو ہمیشہ ہمیشہ کے لیے بہترین طریقے سے خیر آباد کرنے کا فیصلہ کیا۔ان کا کہنا تھا کہ وہ اپنی زندگی کے اگلے مرحلے کے لیے انتہائی پر امید ہیں کہ وہ اطمینان بخش ہوگا۔ کیریئر کے دوران ان کی بہت سے بہترین افراد سے ملاقات ہوئی اور انہوں نے ہمیشہ انڈسٹری میں ذمہ داری کے ساتھ پیشہ ورانہ ذمہ داریاں نبھانے کی کوشش کی۔ان کا کہنا تھا کہ ان کے قریبی دوست جانتے ہیں کہ انہوں نے 2016 سے بہت ہی کم شوبز منصوبوں میں کام کیا اور کچھ منصوبے تو اس لیے تاخیر کا شکار بھی رہے۔
، جس پر وہ معزرت خواہ ہیں۔انہوں نے شوبز انڈسٹری کو خیرآباد کہنے کو اپنی نئی زندگی کی قسمت تلاش کرنے کی جستجو قرار دیتے ہوئے مداحوں، ساتھیوں اور دوستوں سے دعاوں کی گزارش بھی کی۔ان کی اسی پوسٹ پر کئی افراد نے انہیں بہترین اداکارہ قرار دیتے ہوئے ان کی نئی زندگی کے لیے نیک خواہشات کا اظہار کیا۔خیال رہے کہ 35 سالہ عائشہ خان نے کیریئر کا آغاز 2000 سے ٹی وی ڈرامے سے کیا، جب کہ انہوں نے 2013 میں پہلی فلم وار سے فلم ڈیبیو کیا۔انہوں نے 50 سے زائد ڈراموں اور ٹی وی سیریلز میں اداکاری کرنے سمیت 5 کے قریب فلموں میں بھی کام کیا، جب کہ وہ متعدد منصوبوں کے اندر ماڈلنگ کرتی نظر آئیں۔ان کی آخری فلم 2015 میں ریلیز ہونے والی جوانی پھر نہیں آنی تھی، جب کہ ان کا نشر ہونے والا آخری ڈرامہ میری ننھی پری ہے۔