میلبورن ٹیسٹ، انگلینڈ کی پوزیشن مضبوط

میلبورن (اے پی پی) ایلسڑ کک کی شاندار ناقابل شکست سنچری کی بدولت انگلینڈ نے میلبورن ٹیسٹ کے دوسرے روز اپنی اننگز میں 2 وکٹوں کے نقصان پر 192 رنز بنالئے، ایلسٹر کک نے ناقابل شکست 104 رنز بنائے، اس سے قبل آسٹریلوی ٹیم اپنی پہلی اننگز میں 327 رنز بناکر آﺅٹ ہوگئی تھی، ڈیوڈ وارنر 103، سمتھ 76 اور مارش 61 رنز کے ساتھ نمایاں رہے، انگلینڈ کی طرف سے عمدہ باﺅلنگ کا مظاہرہ کرتے ہوئے سٹورٹ براڈ نے 4، جیمز اینڈرسن نے 3 کھلاڑیوں کو آﺅٹ کیا، انگلینڈ کو کینگروز اننگز کا سکور برابر کرنے کےلئے 135 رنز درکار ہیں، آسٹریلیا کی طرف سے ہازلیووڈ اور نیتھن لیون نے ایک ایک کھلاڑی کو آﺅٹ کیا۔ بدھ کو میلبورن کرکٹ گراﺅنڈ پر آسٹریلوی ٹیم نے اپنی پہلی ادھوری اننگز 244 رنز 3 کھلاڑی آﺅٹ پر دوبارہ شروع کی تو کپتان سٹیون سمتھ 65 رنز اور مارش 31 رنز پر کھیل رہے تھے۔ کپتان سٹیون سمتھ آسٹریلیا کے چوتھے آﺅٹ ہونے والے کھلاڑی تھے جو 76 رنز بناکر کیورن کی گیند پر کلین بولڈ ہوگئے، مچل مارش آسٹریلیا کے پانچویں آﺅٹ ہونے والے کھلاڑی تھے جو 9 رنز بناکر واکیز کی گیند پر کلین بولڈ ہوگئے، انکے بعد شان مارش کی اننگز کا بھی خاتمہ ہوگیا اور وہ اپنی نصف سنچری مکمل کرنے کے بعد 61 رنز بناکر براڈ کی گیند پر ایل بی ڈبلیو آﺅٹ ہوگئے، پائن آسٹریلیا کے ساتویں آﺅٹ ہونے والے کھلاڑی تھے جو 24 رنز بناکر جیمز اینڈرسن کی گیند پر کلین بولڈ ہوگئے، برڈ آسٹریلیا کے آٹھویں آﺅٹ ہونے والے کھلاڑی تھے جو 4 رنز بناکر سٹورٹ براڈ کی گیند پر ایل بی ڈبلیو آﺅٹ ہوگئے، کیومنز 4 رنز بناکر سٹورٹ براڈ کی گیند پر کک کے ہاتھوں کیچ آﺅٹ ہوگئے۔