خصوصی سعودی طیا رے کے ذریعے شہباز شریف کی اچانک روانگی

لاہور (خصوصی رپورٹ) وزیراعلیٰ پنجاب محمد شہباز شریف سعودی عرب روانہ ہو گئے وہ سعودی عرب میں عمرہ کی سعادت حاصل کریں گے اور سعودی عرب میں اہم حکومتی شخصیات سے ملاقاتیں بھی کریں گے۔ وزیراعلیٰ سعودی عرب کی جانب سے بھجوائے گئے خصوصی طیارے میں سعودی عرب روانہ ہوئے۔ سیاسی مبصرین سعودی حکومت کی جانب سے شہباز شریف کو بلانے اور اس مقصد کےلئے خصوصی طیارہ بھیجنے کو بڑی اہمیت دے رہے ہیں۔ ان کا کہنا ہے کہ شہباز شریف کو کسی انتہائی اہم مشن کی غرض سے سعودی عرب بلایا گیا ہے کیونکہ سعودی حکومت کا یہ اقدام غیرمعمولی ہے جس سے یہ بھی اندازہ ہوتا ہے کہ ان کے جن معاملات پر بات چیت کرنا مقصود ہے وہ فوری نوعیت کے ہیں۔بتایا گیا ہے کہ شہباز شریف تین روز تک سعودی عرب میں قیام کرینگے، اس دوران دیگر کے علاوہ ان کی سعودی ولی عہد شہزادہ محمد بن سلمان کے ساتھ بھی ملاقات ہوگی، جس میں دوطرفہ دلچسپی کے کئی ایک اہم امور زیر بحث آئیں گے، تجزیہ نگاروں کا کہنا ہے کہ سعودی عرب کی طرف سے اچانک بلاوا اور اس مقصد کیلئے خصوصی طیارہ بھیجنے کا اقدام اہمیت کا حامل ہے، تجزیہ نگار کہتے ہیں کہ اس سے ظاہر ہوتا ہے کہ سعودی عرب کو آئندہ وزیراعظم کے طور پر شہباز شریف قبول ہیں۔