ورلڈ الیون کی آمد کا شیڈول فائنل ٹور سے ملک میں ہاکی کی رونقیں بحال ہونگی:شہباز

لاہور(نیوزایجنسیاں) پاکستان ہاکی فیڈریشن نے ورلڈ الیون کے دورہ پاکستان کا شیڈول جاری کر دیا، مہمان ٹیم 10 جنوری کو پاکستان آنے کے بعد کراچی اور لاہور میں میچز کھیلے گی جب کہ ہال آف فیم ایوارڈ تقریب بھی سجائی جائے گی۔پاکستانی ہاکی فیڈریشن کے سیکریٹری شہباز احمد نے اعلان کیا ہے کہ ورلڈ الیون کی ٹیم آئندہ ماہ 12 اور 14 جنوری کو پاکستان میں دو میچز کھیلے گی۔ورلڈ الیون کی ٹیم ارجنٹائن، ہالینڈ، آسٹریلیا، اسپین اور بلجیم سے تعلق رکھنے والے دنیا کے صف اول کے کھلاڑیوں پر مشتمل ہو گی اور 10 جنوری کو پاکستان پہنچے گی۔شہباز احمد نے کہا کہ ورلڈ الیون پاکستان آمد کے بعد اپنا پہلا میچ 12 جنوری کو کراچی میں کھیلے گی جبکہ دوسرا میچ 14 جنوری کو لاہور میں کھیلا جائے گا۔انہوں نے بتایا کہ اس موقع پر پاکستان اور دیگر ملکوں کے سابق عظیم کھلاڑیوں پاکستان ہاکی فیڈریشن کے ہال آف فیم میں اعزاز سے نوازا جائے گا جبکہ اس دورے سے انٹرنیشنل کھلاڑیوں کو پاکستانی ہاکی لیگ میں شرکت کیلئے راضی کرنے کا موقع بھی ملے گا۔یاد رہے کہ مارچ 2009 میں لاہور میں سری لنکن ٹیم پر دہشت گرد حملے کے بعد پاکستان پر کرکٹ سمیت تمام کھیلوں کیلئے انٹرنیشنل ٹیموں کی آمد کے دروازے بند ہو گئے تھے۔اس کے منفی اثرات ہاکی پر بھی مرتب ہوئے اور اس کے بعد کسی بھی بڑی انٹرنیشنل ہاکی ٹیم نے بھی پاکستان کا دورہ کیا تاہم رواں سال ورلڈ الیون کی کرکٹ ٹیم کے دورہ پاکستان کے بعد پاکستان میں کھیلوں کی واپسی کی راہ ہموار ہوئی ہے۔ واضح رہے کہ گزشتہ روز وزارت داخلہ نے ہاکی ورلڈ الیون کے دورہ کیلئے پی ایچ ایف کو گرین سنگل دیا تھا۔