پاک ویسٹ انڈیز سیریز کے امکانات پر پانی پھرنے لگا

لاہور(نیوزایجنسیاں)پاکستان اور ویسٹ انڈیز کے مابین ٹی ٹوئنٹی سیریز کے امکانات پر پانی پھرنے لگا، بورڈ نے کیریبیئنز کے رواں ماہ دورہ نیوزی لینڈ کیلئے اسکواڈ کا اعلان کر دیا، لاہور میں میچز کے حوالے کوئی حتمی فیصلہ سامنے نہیں آ سکا۔چیئرمین پی سی بی نجم سیٹھی نے ایک ہفتہ قبل سیریز کا شیڈول 3,4روز میں جاری کرنے کا دعوی کیا تھا لیکن کوئی پیش رفت سامنے نہیں آئی، ذرائع کا کہنا ہے کہ پاکستان ویسٹ انڈیز سیریز اس وقت شدید خدشات سے دوچار ہو چکی ہے، سیریز کے ملتوی ہونے کے امکانات زیادہ ہیں، کھلاڑی دورے کیلیے ہچکچاہٹ کا مظاہرہ کر رہے ہیں، بورڈ اور ویسٹ انڈیز پلیئرز ایسوسی ایشن کے درمیان مذاکرات ہونے جا رہے ہیں، ایسوسی ایشن سکیورٹی کی بنیاد پر کھلاڑیوں کو دورہ نہ کرنے کی سفارش کر سکتی ہے۔لاہور کا موجودہ موسم بھی سیریز کے انعقاد کیلئے ایک بڑا چیلنج بن کر سامنے آیا ہے، پی سی بی اس موسم میں میچز کرانے کے حق میں نظر نہیں آتا، دوسری طرف ویسٹ انڈین کرکٹ بورڈ نے رواں ماہ کی 22تاریخ سے شروع ہونےوالے دورہ نیوزی لینڈ کیلیے اسکواڈ کا اعلان کردیا ہے جس کے بعد لاہور میں ٹی ٹوئنٹی سیریز کے امکانات معدوم ہوگئے ہیں۔پاکستان نے ورلڈ ٹی ٹوئنٹی چیمپئن ویسٹ انڈیز کو رواں ماہ کے آخری میں لاہور میں تین ٹی 20 میچوں کی سیریز کھیلنے کی دعوت دے رکھی ہے۔ باوثوق ذرائع کے مطابق ویسٹ انڈیزبورڈ ابھی تک اس ضمن میں ویسٹ انڈین پلیئرز ایسوسی ایشن کی رضامندی حاصل نہیں کرسکا ،کئی سرکردہ کھلاڑیوں کی فیملیز کی مخالفت اپنی جگہ ایک الگ مسئلہ ہے۔