ویسٹ انڈین ٹور فائنل کرنے میں بورڈ کو مشکلات

لاہور(آئی این پی) پاکستان کرکٹ بورڈ کو ویسٹ انڈیز کی سیریز کے شیڈول کو حتمی شکل دینے میں مشکلات کا سامناہے، پی سی بی نے نومبر میں سیریز کے شیڈول کا اعلان دو چار روز میں کرنے کا دعوی کیا ہوا ہے۔پاکستان کرکٹ بورڈ کے چیئرمین نجم سیٹھی اعلان کر چکے ہیں کہ ویسٹ انڈیز کرکٹ ٹیم پاکستان آرہی ہے اور اگلے دو چار روز میں شیڈول کا اعلان کر دیا جائے گا لیکن حقائق کچھ ایسے ہیں جو دورے کے حوالے سے ابہام پیدا کر رہے ہیں۔ذرائع کا کہنا ہے دونوں بورڈز کے درمیان تاحال سیریز کے حوالے سے اتفاق نہیں ہو سکا ہے۔ شیڈول تو دور کی بات ہے ، اگر نو مبر کے وسط میں ویسٹ انڈیز کو دورہ کرنا ہے تو پھر نیشنل ٹی ٹوئنٹی کی تاریخوں کا اعلان کرنے میں جلد بازی نہیں کرنی چاہئے تھی۔دوسری جانب ویسٹ انڈیز کو ایف ٹی پی کے تحت نیوزی لینڈ کا دورہ کرنا ہے جس کا پریکٹس میچ 25 نومبر سے شروع ہوگا، جبکہ پہلا ٹیسٹ یکم دسمبر سے کھیلا جائے گا۔اگر ویسٹ انڈیز دورے اور پھر شیڈول پر رضا مند ہوتی ہے تو پاکستان کے دورے کے لئے وقت بہت کم بچتا ہے کیونکہ ویسٹ انڈیز کو 22نومبر تک نیوزی لینڈ بھی پہنچنا ہے۔اسی صورتحال کے سبب ویسٹ انڈیز کا دورہ پاکستان خدشات سے دوچار ہے ۔