بالی ووڈ اداکارہ ایشوریا رائے 44 برس کی ہو گئیں

ممبئی: (ویب ڈیسک) بالی ووڈ کی خوبصورت اداکارہ ایشوریا رائے 44 برس کی ہو گئی ہیں۔ ایشوریا نے یکم نومبر 1973ء کو بھارتی ریاست کرناٹکا کے شہر منگلورو میں آنکھ کھولی۔ ان کے والد کرشن راج انڈین آرمی میں بائیالوجسٹ تھے جبکہ ان کے بھائی آدتیا رائے ابھی بھی نیوی میں انجینئر کے عہدے پر اپنی ذمہ داریاں ادا کر رہے ہیں۔ایشوریا رائے نے ملکہ حسن کا تاج اپنے سر پر سجانے کے بعد فلمی دنیا میں قدم رکھا اور اپنی اداؤں سے کروڑوں دلوں کی دھڑکن بن گئیں۔ 1999ء میں ریلیز ہوئی فلم ہم دل دے چکے صنم اور 2002ء میں شاہکار فلم دیوداس میں ان کی بے مثال اداکاری کی وجہ سے انھیں فلم فیئر ایوارڈ سے نوازا گیا۔بالی ووڈ کی اس ساحرہ کا سپر سٹار سلمان خان کے ساتھ کافی دیر افیئر رہا لیکن دونوں ایک دوسرے کو اپنا نہیں سکے۔ کہتے ہیں سلمان خان نے ایشوریا کے دکھ میں ہی آج تک شادی نہیں کی۔ تاہم دوسری جانب ایشوریا نے 20 اپریل 2007ء کو فلمسٹار ابھیشیک بچن کے ساتھ اپنی نئی زندگی کا آغاز کیا۔ دونوں اپنی بیٹی کے ساتھ خوش و خرم زندگی میں مگن ہیں۔