ڈوپلیسی اورآملہ دورہ پاکستان کیلئے بے تاب

دبئی /جوہانسبرگ (سپورٹس ڈیسک) ورلڈ الیون میں شامل کھلاڑیوں نے دورئہ پاکستان کو منفرد تجربہ قرار دیدیا۔اپنے پیغام میں ورلڈ الیون کے کوچ اینڈی فلاور نے کہاکہ مہمان کرکٹرز آئندہ ماہ لاہور میں سیریز کیلئے ممکنہ سیکیورٹی انتظامات پر مطمئن ہیں،وہ اس بات پر بہت خوش ہیں کہ پاکستان میں انٹرنیشنل کرکٹ کی بحالی کیلئے اٹھائے جانے والے اقدامات میں انھیں حصہ ڈالنے کا موقع مل رہا ہے۔ دوسری جانب کپتان فاف ڈو پلیسی نے کہا کہ کرکٹ برادری کے مختلف ملکوں سے تعلق رکھنے والے کھلاڑیوں پر مشتمل متوازن اسکواڈ کی قیادت میرے لیے بڑے اعزاز کی بات ہے۔ میری نظریں اپنے پہلے دورئہ پاکستان پر ہیں، امید ہے کہ ہمارا دورہ ملک میں انٹرنیشنل کرکٹ کی بحالی میں مددگار ثابت ہوگا۔
ادھر ہاشم آملہ نے کہاکہ میں دورئہ پاکستان کیلئے بے تاب ہوں، میں کندھے کی انجری سے تیزی کے ساتھ صحتیاب ہورہا اور پرامید ہوں کہ مکمل فٹ ہوکر سیریز کا حصہ بنوں گا۔