سنسناٹی ماسٹرز ٹینس کاتاج مگوروزاکے سرسج گیا

واشنگٹن (سپورٹس ڈیسک) ہسپانوی ٹینس سٹار گربائن موگوروزا نے سنسناٹی ماسٹرز اوپن ٹینس ٹورنامنٹ کا ویمنز سنگلز ایونٹ جیت لیا۔ انہوں نے فائنل میں رومانیہ کی سیکنڈ سیڈڈ سیمونا ہالپ کو شکست دیکر ٹائٹل اپنے نام کرلیا۔ تفصیلات کے مطابق امریکا میں جاری ویمنز سنگلز مقابلوں کے فائنل میں سپین کی گربائن موگوروزا نے انتہائی شاندار کارکردگی کا مظاہرہ کرتے ہوئے رومانیہ کی سیکنڈ سیڈڈ سیمونا ہالپ کو سٹریٹ سیٹس میں 6-1 اور 6-0 سے ہرا کر ٹائٹل جیت لیا۔ اس سے قبل پہلے سیمی فائنل میں سیکنڈ سیڈڈ رومانیہ کی سمونا ہالپ نے امریکا کی سٹیفنز کو ہرا کر فائنل کےلئے کوالیفائی کیا تھا۔ دوسرے سیمی فائنل میں سپین کی گربائن مگوروزا نے ٹاپ سیڈڈ جمہوریہ چیک کی کیرولینا پلسکووا کو شکست دے کر فائنل کھیلنے کا اعزاز حاصل کی تھا۔ ٹورنامنٹ جیتنے کے بعد میڈیا سے بات چیت کرتے ہوئے گربائن نے کہا کہ وہ مکمل طور پر فٹ اور بھرپور فارم میں ہیں اور مستقبل میں بھی عمدہ کارکردگی کے تسلسل کو برقرار رکھتے ہوئے مزید ٹائٹل اپنے نام کرینگی۔