انڈر 19ورلڈ کپ کے شیڈول کا اعلان

دبئی (آئی این پی) انٹرنیشنل کرکٹ کونسل (آئی سی سی )نے انڈر19کرکٹ ورلڈ کپ کے شیڈول کا اعلان کردیا ۔ورلڈ کپ نیوزی لینڈ میں ہوگا۔آئی سی سی کے مطابق انڈر19ورلڈ کپ13جنوری2018سے3فروری تک نیوزی لینڈ میں کھیلا جائے گا جس میں16ٹیمیں شرکت کر رہی ہیں اور تمام میچز چار مختلف مقامات پر کھیلے جائیں گے۔پاکستان کو گروپ ڈی میں سری لنکا، افغانستان اور آئرلینڈ کا چیلنج درپیش ہو گا۔دفاعی چیمپئن ویسٹ انڈیز اور مہمان نیوزی لینڈ کے درمیان افتتاحی میچ کھیلا جائے گا اور ایونٹ کے تمام میچز کرائسٹ چرچ، کوئنز ٹاون، ٹورنگا اور ونگیرائی میں کھیلے جائیں گے۔پاکستانی ٹیم ایونٹ کا پہلا میچ افغانستان کے خلاف 13جنوری کو کھیلے گی۔ایونٹ میں شامل16ٹیموں کو4گروپوں میں تقسیم کیا گیا ہے۔ دفاعی چیمپئن ویسٹ انڈیز، نیوزی لینڈ، جنوبی افریقا اور کینیا کی ٹیمیں شامل ہیں۔گروپ بی میں تین مرتبہ چیمپئن رہنے والی بھارت، آسٹریلیا، زمبابوے اور گھانا کی ٹیمیں شامل ہیں جبکہ گروپ سی میں انگلینڈ، بنگلادیش، کینیڈا اور نمیبیا کی ٹیمیں شامل ہیں۔انڈر 19 ورلڈ میں دو مرتبہ ایونٹ اپنے نام کرنے والی پاکستان، سری لنکا، افغانستان اور آئرلینڈ کی ٹیم گروپ ڈی میں شامل ہے۔انڈر 19 ورلڈ کپ کھیلنے والے چار ایسے کپتان ہیں جو اپنے ملک کی کرکٹ ٹیم کی قیادت کر رہے ہیں جن میں پاکستان کے سرفراز احمد، آسٹریلیا کے اسٹیون اسمتھ، بھارت کے ویرات کوہلی اور نیوزی لینڈ کے کین ولیمسن شامل ہیں۔2016ءمیں منعقدہ ایونٹ کے فائنل میں ویسٹ انڈیز نے بھارت کو شکست دے کر عالمی چیمپئن بننے کا اعزاز حاصل کیا تھا۔ پاکستانی ٹیم 13 جنوری کو افغانستان کے خلاف مہم کا آغاز کرے گی، گرین شرٹس دوسرا میچ 16 جنوری کو آئرلینڈ جبکہ تیسرا اور آخری میچ 19 جنوری کو سری لنکا کے خلاف کھیلے گی۔ واضح رہے کہ دو ٹاپ ٹیموں کے درمیان فائنل 3 فروری کو کھیلا جائے گا۔