شاستری کی کوچنگ میں بھارتی ٹیم سے بڑی توقعات

نئی دہلی(نیوزایجنسیاں)نجومیوں نے پیشگوئیاں شروع کر دی کہ روی شاستری کی کوچنگ میں انڈین ٹیم 2019ء کے ورلڈ کپ میں بہت کامیابیاں سمیٹے گی۔ بھارتی کرکٹ بورڈ (بی سی سی آئی) نے انیل کمبلے کی جگہ سابق کھلاڑی روی شاستری کو انڈین ٹیم کا ہیڈ کوچ مقرر کر دیا ہے۔ نجومیوں کا خیال ہے کہ روی شاستری کی کوچنگ میں بھارتی ٹیم نا صرف بین لاقوامی دوروں میں بلکہ ورلڈ کپ 2019ءمیں بھی بہت کامیابیاں سمیٹے گی۔ایک کرکٹ نیوز ویب سائٹ میں چھپنے والی رپورٹ میں بھارتی نجومیوں نے کہا ہے کہ اگر چیزیں روی شاستری کے زائچے کے مطابق رونما ہوئیں تو وہ انڈین ٹیم کیلئے موثر ثابت ہونگے۔ ان کی کوچنگ اور ویرات کوہلی کی سربراہی میں انڈین ٹیم نا صرف سری لنکا، انگلینڈ، آسٹریلیا، اور نیوزی لینڈ کے دوروں میں کامیابیاں سمیٹے گی بلکہ ورلڈ کپ 2019ء میں بھی یہ سلسلہ جاری رہے گا۔