ناصرجمشید کی اہلیہ نے علیحدگی کی خبروں کومستردکردیا

لاہور (نیوزایجنسیاں) میڈیا رپورٹس کے مطابق سپاٹ فکسنگ کیس میں معطل قومی کرکٹر ناصر جمشید اور ان کی اہلیہ کے درمیان ناچاقی اور کشیدگی کی خبروں کے بعد ڈاکٹر سمارا نے سوشل میڈیا پر ان افواہوں کی سختی سے تردید کر دی ہے۔ دراصل ان خبروں کی وجہ ڈاکٹر سمارا کی سماجی رابطوں کی ویب سائٹ ٹویٹر پر جاری وہ ٹویٹس بنیں جن میں بظاہر وہ دلبرداشتہ نظر آئیں۔ ایک ٹویٹ میں انہوں نے لکھا کہ ہر خود مختار اور مضبوط عورت کے اندر ایک چھوٹی سی شکستہ دل لڑکی ہوتی ہے جو یہ جان چکی ہوتی ہے کہ کسی پر انحصار نہیں کرنا اور کس طرح دوبارہ اٹھنا ہے۔ایک اور ٹویٹ میں انہوں نے لکھا کہ تعلقات ختم ہو جاتے ہیں لیکن زندگی چلتی رہنی چاہیے۔ اب وقت آ گیا ہے کہ خود کو قصور وار نہ ٹھہرا کر مضبوط ہو جاو¿ں۔ان ٹویٹس کا سوشل میڈیا پر آنا ہی تھا کہ فوراً میڈیا کی شہ سرخیوں کی زینت بن گئیں۔ ناصر جمشید کی اہلیہ ڈاکٹر سمارا کو جب ان خبروں کا پتہ چلا تو انہوں نے اس کی سختی سے تردید کرتے ہوئے انھیں جھوٹی خبریں قرار دیدیا۔ ان کا کہنا تھا کہ انھیں نہیں خبر کہ میڈیا کو یہ کیسے پتہ چلا کہ میری اور ناصر جمشید کے درمیان طلاق ہو گئی ہے، لیکن میں بتانا چاہتی ہوں کہ یہ سب جھوٹی اور من گھڑت خبریں ہیں۔