لاہور ( این این آئی) پاکستان کے سابق ہیڈ کوچ وقار یونس نے خواتین کے کرکٹ میچز کو 30 اوورز تک محدود کرنے کے بیان کی وضاحت کر دی ۔ وقار یونس وضاحتی ٹوئٹ میں کہا کہ میری بات کو غلط انداز سے لیا گیا ہے ،میں نے صنفی امتیاز کی بات نہیں کی، میری بات کا مطلب تھا کہ وومن کرکٹ میں اوور کم کرکے کھیل کو تیز کیا جاسکتا ہے اس سے شائقین کی بھی دلچسپی بڑھے گی۔اس سے قبل دنیائے کرکٹ کے بہترین بالروقار یونس کی ایک ٹوئٹ نے گویا ایک طوفان ہی برپا کردیا تھا، کئی ایک نے تو اسے خواتین کے خلاف صنفی امتیاز پر مبنی بیان بھی قرار دیا ۔متعدد افراد خصوصاً خواتین کو وقار یونس کی تجویز ایک آنکھ نہ بھائی اور وہ ان پر برس پڑیں کہ بہتر ہوگا کہ وہ اپنی تجاویز اپنے پاس رکھیں۔ورلڈ کپ کے میچز میں خواتین نئے ریکارڈ بنا رہی ہیں۔ جبکہ کچھ کا کہنا تھا کہ ایسی تجویز دینے سے قبل بہتر ہوتا کہ وہ خواتین کھلاڑیوں سے بھی رائے لے لیتے تاہم جہاں کئی لوگوں اور خصوصا خواتین نے اس تجویز کو تنقید کا نشانہ بنایا ہے وہیں کچھ لوگوں کا کہنا ہے کہ اس معاملے کو نسوانیت پر کوئی ضرب نہ سمجھا جائے۔متعدد لوگوں کی رائے ہے کہ یہ وقار یونس کی اپنی تجویز ہے۔
اور ان کے خیال میں تو یہ مناسب ہی ہے۔ وقار یونس نے اپنے ٹوئٹ میں خواتین کے میچز کو 30 اوور تک محدود کرنے کی دلیل دیتے ہوئے کہا تھا کہ آخر خواتین کے ٹینس میچز بھی تو بیسٹ آف تھری ہوتے ہیں جبکہ مردوں کے درمیان بیسٹ آف فائیو کے مقابلے ہوتے ہیں۔
