اسلام آباد(نامہ نگار خصوصی )وزیر اعظم نواز شریف نے کشمیر ، افغانستان خلیجی ممالک کے تنازع اور مودی ٹرمپ گٹھ جوڑ پر اہم فیصلے کرتے ہوئے اس عزم کا اظہار کیا ہے کہ ملکی سلامتی پر کوئی سمجھوتہ نہیں کیا جائے گا، پاکستان علاقائی و عالمی امن و استحکام کیلئے کردار ادا کرتا رہے گا، پاکستان ہمسایوں سے پرامن تعلقات چاہتا ہے۔ وزیراعظم نواز شریف کی زیر صدارت دفتر خارجہ میں اہم اجلاس ہوا جس میں مشیر خارجہ سرتاج عزیز، سیکریٹری خارجہ تہمینہ جنجوعہ نے مختلف اہم امور پر وزیراعظم نواز شریف کو بریفنگ دی جبکہ پاک بھارت تعلقات، افغانستان کے ساتھ سرحدی معاملات، سعودی عرب قطر کے ساتھ تعلقات، مودی ٹرمپ اعلامیے کے خطے پر اثرات کے حوالے سے بھی وزیراعظم کو آگاہ کیا گیا۔اجلاس میں مقبوضہ کشمیر ، ایل او سی ، کلبھوشن یادیو کیس میں ہونے والی پیش رفت سے بھی وزیر اعظم کو آگاہ کیا گیا۔ اجلاس میں وزیر خزانہ اسحاق ڈار سمیت اعلی حکام بھی موجود ہیں۔اہم اجلاس سے قبل دفتر خارجہ میں اعلی افسران کا اجلاس بھی ہوا جس میں تمام ڈائریکٹر جنرلز نے شرکت کی اور وزیراعظم کو دی جانے والی بریفنگ کے نکات پر غور کیا۔ اجلاس میں وزیر اعظم نواز شریف نے کشمیر ، افغانستا ن خلیجی ممالک کے تنازعے اور مودی ٹرمپ گٹھ جوڑ پر اہم فیصلے کئے اور اس عزم کا اظہار کیا کہ ملکی سلامتی پر کوئی سمجھوتہ نہیں کیا جائے گا،پاکستان علاقائی و عالمی امن و استحکام کیلئے کردار ادا کرتا رہے گا، پاکستان ہمسایوں سے پرامن تعلقات چاہتا ہے ،قومی سلامتی کو یقینی بنانے کیلئے تمام ممکن اقدامات کریں گے۔ انہوں نے خارجہ پالیسی پر اہم فیصلے کرنے کے ساتھ ساتھ کشمیری عوام کی حمایت جاری رکھنے کا اعلان بھی کیا ۔ وزیر اعظم نے کہا کہ پاکستان خطے میں امن و استحکام کیلئے پرامن ہمسائیگی کے اصول پر کاربند رہے گا ۔ افغانستان میں امن کیلئے چین کی سفارتکاری کا خیرمقدم کرتے ہوئے امت مسلمہ کے اتحاد کی کوششیں جاری رکھنے اور سعودی قطر تنازعے میں غیرجانبدار رہنے کا فیصلہ بھی کیا ۔ ذرائع کے مطابق وزیر اعظم نے دفتر خارجہ میں منعقدہ اجلاس سے خطاب کرتے ہوئے کہا کہ پاکستان مقبوضہ کشمیر کے نہتے عوام کی جدوجہد کی بھرپور حمایت جاری رکھے گا ، ملکی سلامتی کو یقینی بنانے کے لیے ہر ممکن اقدامات کئے جائیں گے ، افغانستان میں امن کے لئے چین کی مصالحتی کاوشوں کا خیر مقدم کرتے ہیں ، خلیج کی صورتحال کو معمول پر لانے کے لئے پاکستان بدستور اپنا کردار ادا کرتا رہے گا ۔ وزیر اعظم کو بریفنگ میں بتایا گیا کہ ٹرمپ مودی مشترکہ اعلامیہ میں امریکہ نے کشمیر پر ثالثی کی پیشکش عملا واپس لے لی ہے ، امریکہ نے خطے میں قیام امن میں کردار ادا کرنے کا موقع ضائع کر دیا ۔ اجلاس میں فیصلہ کیا گیا کہ مسئلہ کشمیر کے فوری حل کیلئے سفارتکاری کو مزید متحرک کیا جائےگا ۔
