چیمپئنز ٹرافی کا سفر کارڈف میں ختمنہیں کرنا چاہتے

کارڈف(نیوزایجنسیاں) پاکستان کرکٹ ٹیم کے کوچ مکی آرتھر فائنل میں رسائی کیلیے پرامید ہیں۔میڈیا سے گفتگو کرتے ہوئے قومی کرکٹ ٹیم کے کوچ مکی آرتھر نے کہا کہ چیمپئنز ٹرافی کا سفر کارڈف میں ختم نہیں کرنا چاہتے، انگلینڈ کے خلاف سیمی فائنل جیت کر لندن کا فائنل کھیلنا چاہتے ہیں، انہوں نے کہا کہ انگلینڈ مضبوط ٹیم ہے اسے ہرانا آسان نہیں ہوگا، مڈل آرڈر بیٹنگ فلاپ ہونے پر تشویش ہے اور اس پر کام کر رہے ہیں، سرفراز احمد یا شعیب ملک کو اوپر کھلانے پر بات ہوئی ہے لیکن ابھی اس حوالے سے فیصلہ نہیں کیا گیا۔مکی آرتھر نے کہا کہ ٹیم کی غیرمستقل مزاجی پریشانی کا باعث ہے لیکن بعض اوقات یہی ہماری سب سے بڑی قوت بن جاتی ہے جب کہ محدود اوورز کی کرکٹ میں بہتر ٹیم بنتے جارہے ہیں، انہوں نے کہا کہ ٹی ٹوئنٹی میں عالمی نمبر 2 پوزیشن حاصل کرلی اور ون ڈے رینکنگ میں بھی بہتری کی جانب گامزن ہیں۔سرفراز الیون کو چیمپئنز ٹرافی کے پہلے ٹائٹل کا انتظار ہے ، کرکٹ کا بانی انگلینڈ بھی 19برس سے ٹرافی اپنے نام نہ کر سکا ، انگلش ٹیم چیمپئنز ٹرافی 2004 اور 2013 کے فائنل میں ناکام رہی تھی ، شاہین اس سے پہلے تین بار سیمی فائنل تک پہنچے ، مگر فائنل کی دہلیز پر قدم نہ رکھ سکے۔