سمیع الحق بارے بڑی خبر, اہم فیصلہ جلد متوقع

لاہور (حسنین اخلاق) مولانا سمیع الحق عملی طور پر سیاست سے بیزار،ہر قسم کی سیاسی سرگرمیاں ختم کرنے کا فیصلہ کرلیا۔ مولانا حامد الحق کی جمعیت علماءاسلام -س کے بطور امیر نامزدگی کا قوی امکان جبکہ یوسف شاہ جنرل سیکرٹری کے فرائض سرانجام دیں گے۔ بشیر شاد،عبدالرﺅف فاروقی،عاصم مخدوم سمیت دیگرمرکزی رہنماءبھی اپنے مدارس چلانے میں مصروف ہوگئے۔ کے پی کے اور فاٹا سمیت ملک بھر میں موجود جے یو آئی کا ووٹ اس الیکشن میںصرف مولانا فضل الرحمن ہی کو ملے گا۔ باﺅثوق ذرائع نے خبریں کو بتایا ہے کہ جمعیت علماءاسلام-س کے امیر اور جماعہ حقانیہ اکوڑہ خٹک کے مہتمم مولانا سمیع الحق پاکستان کی سیاست سے مکمل طور پر بیزار ہوچکے ہیں اور انہوں نے عملی طور پر کسی بھی سیاسی سرگرمی میں حصہ لینے سے اپنی جماعت کو بھی منع کردیا ہے جس کے بعد وہ آج کل صرف اپنے مدرسے پر دھیان دے رہے ہیں یا کچھ کتب کی تیاری میں مصروف ہیں۔ ان کے قریبی ذرائع نے دعویٰ کیا ہے کہ مولانا سمیع الحق وزیراعظم پاکستان کی جانب سے طالبان کے ساتھ مذاکرات میں جے یو آئی کے ساتھ دوغلی پالیسی اپنانے کے بعد ناراض ہوئے جس کے بعد بتدریج وہ سیاست سے بھی دور ہوتے گئے ۔ ان کا ماننا تھا کہ ملک میں امن کی خاطر ہر قسم کا خطرہ مول لینے کے باوجود حکومت کی جانب سے انہیں نہ صرف قصوروار ٹہرایا گیا بلکہ ان کے سیاسی حریفوں کو اس ضمن میں کچھ نہ کرنے کے باوجود نوازا گیا۔جے یو آئی ذرائع کے مطابق جلد ہی نئے امیر کا تقرر متوقع ہے جس کے لیے مولانا حامد الحق کا نام لیا جارہا ہے جبکہ مولانا سمیع الحق کے دست راست مولانا یوسف شاہ بطور قیم جمعیت اپنی ذمہ داری ادا کریں گے جبکہ دوسری جانب جمعیت علماءاسلام-س کے تمام سینئر رہنماﺅں نے تنظیمی سرگرمیاں بالکل چھوڑ دیں ہیں اور جماعت سے لاتعلق ہوکر اپنے اپنے مدارس کے انتظام میں مصروف ہیں جس کے بعد دینی حلقے امید کررہے ہیں کہ ستر کی دہائی کے بعد پہلی بار جمعیت علماءاسلام کا ووٹ تقسیم نہیں ہوگا مگر یہ ووٹ اس دفعہ مولانا فضل الرحمن حاصل کریں گے جنہوں نے اس سلسلے میں ان علاقوں اور حلقوں میں لابنگ بھی شروع کردی ہے کہ مولانا سمیع الحق کی غیرموجودگی میں یہ ووٹ انکی جماعت کو دئیے جائیں۔