آغاز رمضان پر سوسائٹی فار ہیومن رائٹس کی جانب سے مستحق خواتین میں راشن تقسیم

لاہور(وقائع نگار) دنیا میں ہر بھوکے کو کھانا کھلانے اور ضرورت مند کی مدد کا دعویٰ کوئی نہیں کرسکتا، لیکن بطور انسان اور مسلمان جو فرائض ہمارے ذمہ ہیں ان کی ادائیگی ہی معاشرے کو بہتر بنانے کا سبب بنتی ہے۔ معاشرے کے محروم طبقے کی فلاح کے لیے سوسائٹی فار ہیومن رائٹس کی کوششیں قابل قدر ہیں۔ ان خیالات کا اظہار چیف ایڈیٹر روزنامہ خبریں و چیئرمین چینل ۵ضیا شاہد نے سوسائٹی فار ہیومن رائٹس کے زیراہتمام آغاز رمضان پر مستحق خاندانوں میں راشن تقسیم کرنے کی تقریب سے خطاب کرتے ہوئے کیا۔ انہوں نے کہا کہ مجھے خوشی ہے کہ رمضان کے آغاز میں اللہ تعالیٰ کے فضل و کرم سے ہمیں یہ سعادت نصیب ہورہی ہے جس کا سلسلہ رمضان کے دوران بھی جاری رہے گا۔ یہ ایک علامتی تقریب ہے کیونکہ دنیا میں کوئی ذی روح یہ دعویٰ نہیں کرسکتا کہ وہ کائنات کے سب بھوکوں کو کھانا فراہم کرسکتا ہے یا تمام حاجت مندوں کی ضروریات پوری کردے گا، لیکن بطور مسلمان ہمیں یہ سمجھنے کی ضرورت ہے کہ قطرہ قطرہ سے ہی دریا تشکیل پاتے ہیں اور اس حوالے سے ہماری کوشش ہے کہ اس میں ہم اپنا حصہ ڈالیں۔ انہوں نے کہا کہ معاشرتی فلاحی کاموں کے حوالے سے سوسائٹی فار ہیومن رائٹس کی کاوش قابل قدر ہے اور اللہ کریم ہمارے عمل کو قبول کرے اور ہمیں اپنی رحمت اور برکت سے نوازے۔ اس موقع پر سوسائٹی فار ہیومن رائٹس کی جانب سے درجنوں خواتین میں راشن کے پیکٹ تقسیم کئے گئے۔ تقریب میں صدر لاہورمحمد رشید، جنرل سیکرٹری ملک آفتاب، جنرل سیکرٹری خواتین ثمرہ نذیر، ایڈیشنل سیکرٹریز عظمت پروین، راحت رشید، تبسم لیاقت، نائب صدر سجاد حیدر فنانس سیکرٹری عبدالغفار، رانا بدیع الزمان، محمد وقاص، محمد اسلام رانا، فرقان حیدر، ندیم سرور اور آفس سیکرٹری اصغر علی شہزاد بھی شامل تھے۔