ناصر جمشید کی بورڈ کو عدالت لے جانے کی دھمکی

لاہور(نیوزایجنسیاں )پاکستان سپر لیگ کے دوران سپاٹ فکسنگ کے معاملے پر مرکزی کردارناصر جمشید نے پاکستان کرکٹ بورڈ کو عدالت میں لے جانے کی دھمکی دے دی۔مائیکرو بلاگنگ ویب سائٹ پر اپنے پیغام میں انہوں نے کہا کہ پی سی بی میرے ساتھ زیادتی کر رہا ہے ،کھلاڑیوں کو بلا کر ان پر دباﺅڈالا جاتا ہے کہ وہ میرے خلاف بیان دیں۔انہوں نے کہا کہ اگر میں یہ کہوں کہ پی سی بی کے اعلیٰ حکا م یہ چیزیں کراتے ہیں تو کیا میری یہ دلیل مان لی جائے گی۔ان کا کہنا تھا کہ پی سی بی میرا نام بدنام کرنے کے بجائے ثبوت دے،میں چیلنج کرتا ہوں کہ پی سی بی میرے خلاف ثبوت میڈ یا پر لے کر آئے۔ناصر جمشید نے کہا کہ معاملے کو پیشہ وارانہ طریقے سے دیکھا جائے ،اس وجہ سے میری ذاتی زندگی متاثر ہو رہی ہے۔انہوں نے مزید کہا کہ سپاٹ فکسنگ کیس کے حوالے سے میری اپنے وکلا سے بات ہو گئی ہے ،ہم پی سی بی کو عدالت میں لے کر جائیں گے۔واضح رہے کہ پی سی بی حکام کو یقین ہے کہ ناصر جمشید سپاٹ فکسنگ کیس میں مرکزی حیثیت رکھتے ہیں۔انہیں برطانیہ کی نیشنل کرائم ایجنسی نے بھی اسی دن گرفتار کیا تھاجب پی سی بی نے انہیں معطل کیا۔