شعیب ملک نے وہ کر دکھا یا جو آج تک کوئی پاکستانی کھلاڑی نہ کر سکا

لاہور(ویب ڈیسک)پاکستانی کرکٹ ٹیم کے سابق کپتان شعیب ملک لگاتار چھٹی بار انٹرنیشنل کرکٹ کونسل(آئی سی سی) چیمپینز ٹرافی کھیلنے والے پہلے پاکستانی کھلاڑی بن گئے ہیں۔آئی سی سی کی جانب سے جاری ہونے والے بیان کے مطابق شعیب ملک کے علاوہ دنیا بھر سے صرف 8 کھلاڑی ایسے ہیں جو چھ بار اس ٹورنامنٹ کا حصہ بن چکے ہیں۔ ان کھلاڑیوں میں آسٹریلیا کے رکی پونٹنگ، بھارت کے راہول ڈریوڈ، نیوزی لینڈ کے ڈینیل ویٹوری، جنوبی افریقہ کے مارک باوچر اور جیک کیلس اور سری لنکا کے سنتھ جے سوریا، مہیلا جے وردنے اور کمار سنگاکارا شامل ہیں۔اس ٹورنامنٹ کیلئے چھٹی بار پاکستان ٹیم میں شامل کئے جانے پر شعیب ملک نے خوشی کا اظہار کرتے ہوئے کہا کہ آئی سی سی چیمپینز ٹرافی جیسے بہترین ٹورنامنٹ کیلئے پاکستانی سکواڈ میں شامل کئے جانے پر میں بہت خوش ہوں۔ 6 بار یہ ٹورنامنٹ کھیلنے والے دیگر کھلاڑیوں کے ناموں کو دیکھتے ہوئے مجھے فخر محسوس ہو رہا ہے، کیونکہ یہ تمام کرکٹ کی تاریخ کے بہترین کھلاڑی ہیںپاکستانی ٹیم کے کاکردگی کے بارے میں سابق کپتان کا کہنا تھا کہ ایک روزہ ٹیم کے سکواڈ کو دیکھتے ہوئے ہمیں اپنی فارم کو دوبارہ بہتر کرنا ہوگا اور دیگر ٹیموں کے خلاف سخت محنت کرنا ہوگی۔اس ٹورنامنٹ میں بہتر کارکردگی سے ہماری عالمی رینکنگ میں بہتری آئے گی اور ہمیں ورلڈ کپ 2019 کے لیے کوالیفائی کرنے میں مدد ملے گی۔دوسری جانب پاکستان کی ایک روزہ ٹیم کے کپتان سرفراز احمد سکواڈ میں شامل ان نو کھلاڑیوں میں شامل ہیں جو پہلی مرتبہ یہ ٹورنامنٹ کھیل رہے ہیں جبکہ محمد حفیظ تیسری بار اس ٹورنامنٹ میں حصہ لے رہے ہیں۔۔واضح رہے کہ 35 سالہ شعیب ملک اس سے قبل 2002، 2004، 2006، 2009 اور 2013 میں اس ٹورنامنٹ میں پاکستان کی نمائندگی کر چکے ہیں اور اس ٹورنامنٹ میں کھیلے گئے 15 میچوں میں 10 وکٹیں اور 326 رنز بنا رکھے ہیں۔ انگلینڈ اور ویلز میں کھیلی جانے والے آئی سی سی چیمپینز ٹرافی کا آغاز یکم جون سے ہو رہا ہے جو کہ 18 جون تک جاری رہیں گے جبکہ پاکستان اپنا پہلا میچ روائتی حریف بھارت کے خلاف 4 جون کو کھیلے گا۔