سڈنی(شوبز ڈیسک) ہالی ووڈ کے معروف گلوکار مائیکل جیکسن نے مرنے سے ایک ہفتہ قبل اپنے قریبی دوست سے قتل کیے جانے کے شبہے کا اظہار کیا تھا۔دنیا بھر کے مشہور پاپ گلوکار مائیکل جیکسن کو دنیا سے گزرے 8 سال ہوگئے ہیں اور اب بھی ان کی موت معمہ بنی ہوئی ہے جب کہ میڈیکل رپورٹس کے مطابق مائیکل جیکسن کی موت ادویات کے زیادہ استعمال کے باعث ہوئی ہے تاہم ان کی بیٹی والد کی موت کو قتل قرار دیتی ہیں لیکن اب پاپ گلوکار کے انتہائی قریبی دوست کے حیران کن دعوے کے بعد ایک بار پھر مائیکل جیکسن کی موت پر سوالات اٹھ گئے ہیں۔غیر ملکی خبر رساں ادارے کے مطابق پاپ گلوکار مائیکل جیکسن کے دوست اورجرمن بزنس مین جیکب شیگن نے گلوکار کے اپنے انتقال سے ایک ہفتہ قبل قتل کیے جانے کے خدشے کا اظہار کیا تھا۔ جیکب نے آسٹریلوی ٹی وی شو کے دوران بتایا کہ اپنی موت سے چند ہفتے قبل مائیکل جیکسن نے انہیں 13 پیغامات بھیجے جس میں انہوں نے اپنی زندگی کو لاحق خطرات سے آگاہ کیا جب کہ ایک بار مائیکل جیکسن فون کر کے روپڑے تھے اور اپنے قتل کیے جانے کے خدشے کا اظہار کیا تھا۔
