پی سی بی کو ناصر جمشید کے خلاف تحقیقات کرنے کی اجازت دیدی گئی

لندن(نیوزایجنسیاں)برطانوی تحقیقاتی ادارے نیشنل کرائم ایجنسی نے پاکستان کرکٹ بورڈ کو اسپاٹ فکسنگ اسکینڈل کے مرکزی کردار ناصر جمشید کے خلاف تحقیقات کرنے کی اجازت دےدی۔ناصر جمشید نے اپنے وکیل کے ذریعے یہ اعتراض اٹھایا تھا کہ چونکہ ان کے خلاف برطانوی نیشنل کرائم ایجنسی اسپاٹ فکسنگ اسکینڈل میں ملوث ہونے کی تحقیقات کر رہی ہے، لہٰذا پی سی بی ان کے خلاف تحقیقات نہ کرے۔پی سی بی ذرائع کے مطابق اس اعتراض کی وجہ سے پی سی بی اور کرکٹ کی عالمی تنظیم (آئی سی سی) نے برطانوی ادارے نیشنل کرائم ایجنسی سے اس معاملے پر رابطہ کیا تھا، جس کے بعد برطانوی تحقیقاتی ادارے نے پاکستان کو پیغام پہنچایا ہے کہ انہیں بیک وقت دو ایجنسیوں کی جانب سے تحقیقات پر کوئی اعتراض نہیں۔ ذرائع کے مطابق ادارے کا کہنا تھا کہ پی سی بی چاہے تو اپنی تحقیقات پاکستان میں کرسکتا ہے جبکہ ہم اپنی تحقیقات برطانیہ میں کرینگے۔تاہم اس معاملے پر اب تک ناصر جمشید کا موقف سامنے نہیں آسکا۔اس سے قبل گذشتہ ماہ 14 اپریل کو اپنے ایک ویڈیو پیغام میں ناصر جمشید نے خود پر لگائے گئے الزامات کی تردید کرتے ہوئے کہا تھا کہ ‘نہ تو انھوں نے گھر تبدیل کیا اور نہ ہی وہ کسی سے چھپ رہے ہیں۔۔یاد رہے کہ پاکستان سپر لیگ (پی ایس ایل) کے دوسرے ایڈیشن کے پہلے ہی دن اسپاٹ فکسنگ اسکینڈل منظر عام پر آیا تھا جس میں مبینہ طور پر ملوث ہونے والے کھلاڑیوں کو معطل کر دیا گیا تھا، جن میں خالد لطیف، محمد عرفان، شاہ زیب حسن، شرجیل خان اور ناصر جمشید شامل ہیں۔ناصر جمشید پی ایس ایل کا حصہ نہیں تھے۔قومی ٹیم کے اوپنر ناصر جمشید کو اسپاٹ فکسنگ کیس میں ملوث ہونے کے شبہ میں برطانیہ میں تفتیشی اداروں نے یوسف نامی بکی کے ہمراہ گرفتار کیا تھا لیکن انہیں بعدازاں انھیں ضمانت پر رہا کرکے ان کا پاسپورٹ ضبط کر لیا گیا تھا۔