خیبر پختونخوا سے کپتان آوٹ, اتحادی جماعتوں کا نیا پلان منظر عام پر!!!

اسلام آباد (خصوصی رپورٹ) باخبر ذرائع سے معلوم ہوا ہے کہ مسلم لیگ (ن) کی اعلیٰ قیادت نے حکومتی اتحاد میں شامل جماعتوں کے ساتھ مل کر عام انتخابات کی سیاسی حکمت عملی تیار کرنے کا فیصلہ کیا ہے۔ مسلم لیگ اتحادی جماعتوں کو انتخابی اتحاد میں شامل کرنے کا ارادہ رکھتی ہے۔ مسلم لیگ پنجاب میں جماعت اسلامی کے بجائے جمعیت علماءاسلام (ف) کو اکاموڈیٹ کرے گی جبکہ خیبرپختونخوا میں جمعیت علماءاسلام (ف)، عوامی نیشنل پارٹی، قومی وطن پارٹی کے ساتھ مل کر انتخابی اتحاد بنانے کی تجویز پر غور کررہی ہے۔ وزیراعظم محمد نوازشریف خیبرپختونخوا میں تحریک انصاف کا گھیرا تنگ کرنے کے لیے دیگر جماعتوں سے انتخابی اتحاد کرنا چاہتے ہیں۔ 2013ءکے انتخابی نتائج کی بنیاد پر نشستوں کی الاٹمنٹ کی جائے گی۔ خیبرپختونخوا میں امیر مقام اور مرتضیٰ جاوید عباسی کو فری ہینڈ دے دیا گیا ہے، انہیں منتخب ہونے کی صلاحیت رکھنے والی شخصیات کو مسلم لیگ (ن) میں شامل کروانے کی ذمہ داری سونپی گئی ہے۔ ذرائع کے مطابق مسلم لیگ (ن) کی قیادت آئندہ انتخابات میں بلوچستان میں نیشنل پارٹی اور جمعیت علماءاسلام (ف) کے ساتھ مل کر انتخابی اتحاد بنانے کی کوشش کررہی ہے۔ وزیراعظم محمد نوازشریف سندھ میں پیپلزپارٹی اور تحریک انصاف مخالف سیاسی جماعتی اتحاد بنانے کے لیے سیاسی جماعتوں سے رابطے کررہے ہیں۔ آئندہ انتخابات میں مسلم لیگ (فنکشنل) کو بڑا حصہ دے کر اتحاد کا حصہ بنایا جائے گا۔