کولمبو( سپورٹس ڈیسک )انٹر نیشنل کر کٹ کونسل ( آئی سی سی )اجلاس سے قبل ایشین کرکٹ حکام کی کولمبومیں اہم ملاقات ہوگی جس میں بگ تھری کے خاتمے اور زمبابوے کاٹیسٹ اسٹیٹس بچانے کیلئے مشترکہ لائحہ عمل طے کیا جائے گا۔اس ماہ آئی سی سی اجلاس سے قبل ایشین بورڈ حکام کولمبو میں اہم ملاقات کریں گے۔ چیئرمین پی سی بی شہریارخان، سری لنکا کرکٹ کے تھلنگا سماتھی پالا اور بنگلہ دیش کرکٹ بورڈ کے صدرناظم الحسن اجلاس میں شریک ہوں گے۔باوثوق ذرائع کے مطابق بھارتی بورڈ ارکان آئی پی ایل میں مصروفیت کی وجہ سے ایشین ممالک کے اجلاس میں شرکت نہیں کریں گے۔تینوں بورڈ بگ تھری کے خاتمے اور بھارت کے اضافی شیئرز پر مبنی آئی سی سی فنڈز کی تقسیم کے فارمولے کی مخالفت اور زمبابوے کاٹیسٹ اسٹیٹس برقرار رکھنے کے بارے میں مشترکہ لائحہ عمل طے کریں گے۔ پی سی بی ذرائع کے مطابق میزبان سری لنکن بورڈ کے سربراہ مہمانوں کیلئے ڈنر دیں گے جبکہ بی سی سی آئی کے چیف ایگزیکٹیو راہول جوہری کی شرکت وڈیولنک کے ذریعے متوقع ہے۔
