لاہور (خصوصی رپورٹ) مسلم لیگ ن سے تخت لاہور چھیننے کیلئے تحریک انصاف لاہور کے گلی محلوں میں نکل پڑی۔ یونین کونسلوں میں دفاتر بنانے کا سلسلہ جاری ہے۔ اربن تنظیم نے شہر میں 40 یونین کونسلوں میں دفاتر کا افتتاح کردیا۔ 30 اپریل تک مزید 50 دفاتر کے افتتاح کا ہدف مقرر کیا گیا ہے۔ ڈسٹرکٹ باڈی کی تنظیم مکمل کر لی گئی۔ ایگزیکٹو کونسل اور ایڈوائزری بورڈ بھی قائم کردیئے گئے۔ تحریک انصاف نے لاہور میں پارٹی کے بڑے کھلاڑیوں کو انتخابی میدان میں اتارنے کا بھی فیصلہ کرلیا۔ عمران خان نے لاہور میں فتح کو پنجاب اور پنجاب کی فتح کو ایوان اقتدار تک جانے کا راستہ قرار دے کر ہر ماہ لاہور میں سرگرمیوں کا اعلان کیا ہے۔ دوسری طرف تحریک انصاف لاہور اربن کے صدر ولید اقبال‘ جنرل سیکرٹری حماد اظہر اور دیگر عہدیدار سیاسی مقابلے کیلئے تیزی سے تنظیمیں بنانے‘ یونین کونسل کی سطح پر دفاتر کے قیام اور مضبوط انتخابی کھلاڑی میدان میں لانے میں مصروف ہیں۔ خواتین‘ یوتھ‘ ٹیچرز‘ علمائ‘ ڈاکٹرز‘ لیبر‘ تاجروں اور اقلیتوں کو کونسلز کی تشکیل کی نمائندگی دی جارہی ہے۔ روزانہ کی بنیاد پر یونین کونسل کے دفاتر کا افتتاح ہورہا ہے جبکہ 30 اپریل تک 90 یونین کونسلز میں دفاتر کے قیام کا ہدف مقرر کیا گیا ہے۔ پارٹی کے قائد عمران خان سمیت دیگر مرکزی رہنماﺅں جہانگیر ترین‘ چودھری سرور‘ شفقت محمود‘ یاسمین راشد اور دیگر کو انتخابی میدان میں اتارنے کی تیاری کی جارہی ہے
