فوجی عدالتوں کی توسیع کا معاملہ, اہم پیشرفت سامنے آگئی

اسلام آباد (خصوصی رپورٹ) سینٹ کا اجلاس آج دوبارہ شروع ہو گا۔ چیئرمین سینٹ میاں رضا ربانی اجلاس کی صدارت نہیں کریں گے۔ ایوان بالا کے گزشتہ اجلاس میں 28ویں آئینی ترمیم کی منظوری کے لئے دوتہائی اکثریت نہ ہونے پر اجلاس کی کارروائی ملتوی کردی گئی تھی۔ میاں رضا ربانی اجلاس کی صدارت سے پیشگی معذرت کر چکے ہیں۔ آئینی ترمیم کی مخالف جماعت سے تعلق رکھنے کی وجہ سے ڈپٹی چیئرمین سینٹ مولانا عبدالغفور حیدری کی جانب سے بھی اجلاس کی صدارت نہ کرنے کا امکان ہے۔ سینٹ اجلاس آج سہ پہر تین بجے ہو گا۔ قوی امکان ہے پینل آف پریذائیڈنگ افسر کے رکن مسلم لیگ (فنکشنل) کے رہنما مظفر حسین شاہ اجلاس کی صدارت کریں گے۔ حکومتی جماعت کی طرف سے اجلاس میں دوتہائی اکثریت کی موجودگی کو یقینی بنانے کے لئے اراکین سینٹ سے ہنگامی طور پر رابطے کئے جارہے ہیں اور آج ان کی اسلام آباد میں موجودگی کی تصدیق کی جارہی ہے۔ وزیراعظم نوازشریف نے پاکستان مسلم لیگ (ن) کے تمام سنیٹرز کو ہر صورت سینٹ اجلاس میں شرکت کو یقینی بنانے کی ہدایت کر دی ہے۔ اراکین کو وزیراعظم کے خصوصی پیغام سے آگاہ کردیا گیا ہے۔ کل سہ پہر فوجی عدالتوں کی مدت میں توسیع کی آئینی ترمیمی بل کی منظوری کے مرحلہ کو سینٹ سے مکمل کرنے کے سلسلے میں حکمران جماعت کو سخت دشواری کا سامنا ہے۔ اتحادی جماعتیں بھی ساتھ نہیں ہیں۔ توقع ہے کہ پیپلز پارٹی اور تحریک انصاف کے تعاون سے سینٹ سے بھی فوجی عدالتوں کی آئینی ترمیم دوتہائی اکثریت سے زائد سے منظور کر لی جائے گی۔ حکومت کی طرف سے تمام سیاسی جماعتوں سے رابطے کئے جا رہے ہیں تاکہ دوتہائی اکثریت کی موجودگی کا اندازہ کیا جا سکے۔ وزیراعظم نے وزیرخزانہ اسحاق ڈار اور قائد ایوان راجہ ظفرالحق کو ایوان میں دوتہائی اکثریت کی موجودگی کو ہرصورت یقینی بنانے کی ہدایت کی ہے۔ اس بارے میں وزیراعظم کا سنیٹرز کو خصوصی پیغام سے آگاہ کرنے کا سلسلہ جاری ہے۔ یاد رہے کہ 22مارچ کو سینٹ اجلاس میں 22مارچ کو 28ویں آئینی ترمیم پر رائے شماری کے موقع پر دوتہائی اکثریت موجود نہ ہونے پر اجلاس پانچ روز کے لئے ملتوی کردیا گیا۔