میرا نے پراپرٹی ٹیکس کی مد میں ایک لاکھ روپے جمع کرادئیے

لاہور (شوبز ڈیسک) فلمسٹار میرا نے پراپرٹی ٹیکس کی مد میں ایک لاکھ روپے جمع کروا دیا ۔ تفصیلات کے مطابق محکمہ کنٹونمنٹ بورڈ والٹن چھاﺅنی نے اداکارہ میرا کو 3لاکھ 39ہزا تین سو روپے کا پراپرٹی ٹیکس ادا کرنے کے لئے نوٹس بھیجا تھا جس پر میرا نے متعلقہ آفس جا کر موقف اختیار کیا کہ ان کے ایریے میں فی کنال 15ہزار روپے ٹیکس بنتا ہے اور میرے ذمے چار پانچ سال کا ٹیکس 60سے 75ہزار روپے بنتا ہے لیکن مجھے تین لاکھ سے زیادہ کا نوٹس بھیجا گیا ہے جو کہ درست نہیں ۔ جس پر متعلقہ حکام نے ان کو یقین دہانی کروائی کہ آپ کے ذمے ٹیکس کی دوبارہ چھان بین کی جائے گی ۔ اس موقع پر اداکارہ میرا نے ایک لاکھ روپے پراپرٹی ٹیکس کی مد میں جمع کروا دیا ۔ اس حوالے سے میرا نے ” این این آئی“ سے خصوصی گفتگو کرتے ہوئے کہا کہ میں نے اپنی زندگی بھر کی کمائی سے ڈیفنس میں گھر بنایا تھا اور اس پر اتنا زیادہ ٹیکس سراسر ظلم ہے ۔، متعلقہ حکام کو اس حوالے سے نوٹس لینا چاہیے ۔ انہوں نے کہا کہ میرے علاقے میں فی کنال 15ہزار روپے سالانہ پراپرٹی ٹیکس بنتا ہے اور اس تناسب سے چار سال کا 60ہزار روپے اور اگر پانچ سال بھی لگائے جائیں تو 75ہزار روپے بنتے ہیں ۔ مجھے بھی 15ہزار روپے فی کنال کے حساب سے ٹیکس بھرنے میں کوئی عار نہیں کیونکہ پاکستانی شہری ہونے کے ناطے ہر ایک کا فرض ہے کہ وہ اپنے ذمے واجب الاد ٹیکس ادا کرے۔انہوں نے کہا کہ میں اس ملک کی فنکارہ ہوں جس نے اپنے ملک کے لئے بے شمار خدمات انجام دی ہیں ۔