حیدرآباد(آئی این پی)دہلی فسادات کے بعد اب اگلا نشانہ حیدرآباد ہونے کا دعویٰ کرتے ہوئے سوشل میڈیا پر ایک آڈیو گشت کر رہی ہے جس کے نتیجہ میں پولیس تشویش کا شکار ہوگئی، پولیس عہدیدار دعوی کر رہے ہیں کہ شہر میں کسی قسم کے فساد کا خطرہ نہیں ہے اور لااینڈ آرڈر صورتحال اطمینان بخش ہے لیکن ایک آڈیو نے پولیس کو الجھن میں مبتلا کردیا۔عالمی میڈیا کے مطابق ایک آڈیو واٹس ایپ گروپس میں پائی گئی جس میں بتایا گیا کہ دہلی کے بعد حیدرآباد اگلا نشانہ ہے اور یہاں مسلمان اپنی دفاع کیلئے تیار نہیں ہیں ۔ کئی واٹس ایپ گروپس میں یہ آڈیو وائرل ہوچکی ہے جس کے نتیجہ میں شہر کے اقلیتی طبقہ کے افراد تشویش کا شکار ہوگئے ہیں۔ اس خبر میں ایسی باتوں کا تذکرہ کیا گیا جو پولیس کیلئے درد سر بن گیا ہے۔ ساوتھ ایشین وائر کے مطابق وائرل میسج کثرت سے واٹس ایپ گروپس میں پائے جانے کے بعد انٹیلی جنس ایجنسیاں بھی چوکس ہوگئی ہیں اور ایک مخصوص ویب سائیٹ کی تفصیلات حاصل کرنے کی کوشش کی جارہی ہے ۔ اس سلسلہ میں انٹیلی جنس تکنیکی ٹیمیں اور حیدرآباد سٹی پولیس کی آئی ٹی سیل اور سائبر کرائم پولیس چوکس ہے۔ کمشنر حیدرآباد انجنی کمار نے اپنے ٹوئیٹر کے ذریعہ عوام سے اپیل کی ہے کہ وہ اشتعال انگیز مواد واٹس ایپ پر نہ پھیلائیں، چونکہ بعض شرپسند افراد غلط اور بے بنیاد خبریں پھیلا رہے ہیں۔ساوتھ ایشین وائر کے مطابق انہوں نے عوام سے اپیل کی کہ افواہوں پر دھیان نہ دیں اور غلط خبروں پر بھروسہ نہ کریں ۔ انجنی کمار نے کہا کہ وہ امن کے دشمنوں کو بے نقاب کرنے میں مدد کریں اور حیدرآباد کی گنگا جمنی تہذہب مستحکم کریں۔
