سرینگر(اے این این ) مقبوضہ کشمیر میں بھارتی فوج نے مظالم کا سلسلہ جاری رکھتے ہوئے مزید چار نوجوانوں کو شہید کر دیا ہے جبکہ معرکہ آرائی میں ایک فوجی ہلاک اور دو زخمی ہوئے،واقعہ کےخلاف لوگوں کا احتجاج،فوج کی مظاہرین پر سیدھی فائرنگ ،تین لڑکیوں سمیت کئی زخمی،نوجوان بینائی سے محروم ،علاقے میں کشیدگی،تعلیمی ادارے اور کاروباری مراکز بند،انٹر نیٹ موبائل سروس معطل ۔بھارتی میڈیا کے مطابق مقبوضہ کشمیر کے ضلع شوپیاں میں بھارتی فوج نے مشترکہ آپریشن میں مزید چار نوجوانوں کو شہید کر دیا ہے جبکہ ایک فوجی بھی جھڑپ میں مارا گیاہے ۔یہ واقعہ ضلع شوپیاں کے علاقے نادی گام میں پیش آیا جہاں فورسز اور جنگجوو¿ں کے درمیان جھڑپ ہوئی ۔بھارتی فوج کے ترجمان کرنل راجیش کالیا نے واقعہ کی تصدیق کرتے ہوئے میڈیا کو بتایا کہ شوپیاں میں بھاریت فوج اور سکیورٹی ایجنسیوں کو علاقے میں مجاہدین کی موجودگی کی اطلاع ملی تھی جس پر علاقے کو محاصرے میں لے کر سرچ آپریشن کا آغاز کیا گیا اور لوگوں کو گھروں کے اندر رہنے کی ہدایت کی گئی۔فورسز نے انٹر نیٹ اور موبائل سروس معطل کر کے تلاشی کا آغاز کیا تو نادی گام میں فورسز پر مبینہ مجاہدین نے فائر کھول دیا جس کے نتیجے میں ایک اہلکار ہلاک اور دو فوجی زخمی ہو گئے جنھیں ہسپتال منتقل کیا گیا۔بھارتی فوج ،پولیس اور پیرا ملٹری فورسز کی جوابی کارروائی میں چار جنگجو مارے گئے ۔سرینگر میں موجود فوجی ترجمان نے مارے جانے والوں کی شناخت اور واقعہ سے متعلق مزید معلومات فراہم نہیں کی۔ایک پولیس اہلکار نے میڈیا کو بتایا کہ جھڑپ میں ایک فوجی ہلاک اور دو زخمی ہوئے ۔یہ واقعہ منگل کی صبح کے وقت پیش آیا جب لوگ سو رہے تھے۔مقامی لوگوں کے مطا بق معرکہ آرائی کے دوران جاں بحق ہوئے چار جنگجوﺅں کی شناخت ہوگئی ہے۔پولیس ذرائع کے مطابق چاروں جاں بحق جنگجوﺅں کا تعلق حزب المجاہدین سے تھا جن کی شناخت انعام الحق ساکنہ فری پورہ،عابد نذیر وگے ساکنہ پڈر پورہ،معراج الدین ساکنہ دراونی زینہ پورہ اور بشارت احمد ساکنہ چھوٹی گام کے طور پر ہوئی ہے۔واقعہ کی اطلاع ملتے ہی لوگوں کی بڑی تعداد گھروں سے باہر نکل آئی اور احتجاج شروع کر دیا۔اس موقع پر لوگوں نے قابض اہلکاروں پر پتھراو¿ کیا اور جوابی کارروائی میں تین لڑکیوں سمیت متعدد افراد زخمی ہو گئے۔مقامی ذرائع کے مطابق فورسز نے سنگباری کررہے مظاہرین کو منتشر کرنے کیلئے گولیاں چلائیں اور پیلٹ فائرنگ کا استعمال کیا۔ذرائع نے کہا کہ سمرن جان، مینو جان اور رافیہ جان نامی تین مقامی لڑکیاں فورسز کی گولیاں لگنے سے زخمی ہوگئیں جبکہ بلال احمد نامی نوجوان کی آنکھوں میں پیلٹ لگے۔شوپیان اسپتال سے زخمیوں کوعلاج کیلئے سرینگر کے مختلف اسپتالوں میں منتقل کیا گیا ہے۔علاقے میں کشیدہ صورتحال کے باعث تعلیمی ادارے بند کر دئیے گئے جبکہ دکانیں اور بازار بھی نہیں کھولے گئے ۔دریں اثناءجموں کے سانبہ سیکٹر میں سرحد پر قائم ایک اگلی چوکی کے اندر ہوئے پر اسرارگرینیڈ دھماکہ میں بارڈر سیکورٹی فورسBSFکا ایک اسسٹنٹ کمانڈنٹ ہلاک جب کہ 4دیگر افسر زخمی ہو گئے۔ بی ایس ایف ترجمان منوج یادو نے کشمیر عظمی کو بتایا کہ یہ دھماکہ سانبہ سیکٹر میں پاکستان کے ساتھ لگتی بین الاقوامی سرحد کے قریب قائم ایک ہر اول چوکی اندر ہوا جس میں ایک بی ایس ایف افسر کی موت واقع ہو گئی جب کہ4 دیگر زخمی ہو گئے ، تاہم ترجمان نے اس واقعہ کی مزید تفصیلات دینے سے انکار کر دیا۔ ایڈیشنل ڈپٹی کمشنر سانبہ ارون منہاس نے اسسٹنٹ کمانڈنٹ کی موت کی تصدیق کرتے ہوئے کہا کہ اس سانبہ کے منگو چک علاقہ کی بی ایس ایف پوسٹ میں ہوئے دھماکہ میں مزید4 اہلکار زخمی ہو گئے ۔ انہوں نے کہا کہ معاملہ کی تحقیقات جاری ہے اور مزید تفصیلات کا انتظار ہے ۔ معتبر ذرائع کا کہنا ہے کہ یہ دھماکہ شام 5:15بجے تربیتی سیشن کے دوران پیش آیا جس میںبی ایس ایف کے نو بھرتی شدہ سب انسپکٹروں کو پوسٹ کے اندر اسلحہ چلانے کی تربیت دی جا رہی تھی کہ اچانک ایک گرینیڈ پھٹ گیا جس کے نتیجہ میںاسسٹنٹ کمانڈنٹ جابر سنگھ کی موقعہ پر ہی موت واقع ہو گئی ، انسپکٹر نریش نائیڈو، انسپکٹر جی اجیت کمار، سب انسپکٹر امیت اورسب انسپکٹر آکاش شدید زخمی ہو گئے، اس کے علاوہ ایک اہلکار کو معمولی زخم آئے ۔ تمام زخمیوں کوملٹر ی ہسپتال ستواری پہنچایا گیا ہے جہاں ان میں سے چند ایک کی حالت تشویشناک بیان کی جاتی ہے ۔ دریں اثنا آئی جی بی ایس ایف جموں رام اوتار نے سینئر افسران کے ہمراہ موقعہ کا دورہ کر کے صورتحال کا جائزہ لیا۔ ذرائع نے بتایا کہ معاملہ کی محکمہ جاتی انکوائری کا حکم جاری کر دیا گیا ہے ۔
