بانی خبریں میڈیا گروپ،ضیاء شاہد انتقال کر گئے

لاہور(تجزیہ کار) بانی خبریں میڈیا گروپ ضیا شاہد انتقال کرگئے، چیف ایڈیٹر خبریں گروپ ضیا شاہد پاکستان میں جدید صحافت کے بانی تھے، کافی عرصے سے علیل تھے، چند روز سے لاہور کے پرائیویٹ ہسپتال میں زیر علاج تھے، گذشتہ روز ان کا دل کا آپریشن کیا گیا، مگر وہ جانبر نہ ہوسکے، ان کی نماز جنازہ آج شام ساڑھے 4بجے ماڈل ٹاؤن این بلاک کرکٹ گراؤنڈ میں اداکی جائیگی۔ ان کی وفات سے صحافت کا 50سالہ عہد اختتام پذیر ہوا۔ ضیا شاہد نے صحافی دنیا میں 50سال انقلاب برپا کیا۔ جدید صحافت کے بانی تھے۔جرات مندانہ صحافت ان کا طرہ امتیاز رہا۔ ان کے بے لاگ تبصرے ،جاندار ٹی وی پروگرام ان کی اعلیٰ صحافتی صلاحیتوں کے آئینہ دار تھے۔ آپ 30سے زائد کتابوں کے مصنف تھے۔ آپ عہد حاضر کے قد آور صحافی تھے۔ جس کا اعتراف ہر سطح پر کیا گیا۔ آپ نے اپنے کیریئر کے دوران دنیا کی نامور شخصیات کے انٹرویو کیے اور وزیراعظم کے غیر ملکی دوروں پر ساتھ جاتے رہے ، آپ کی صحافتی خدمات کو سنہری حروف میں لکھا جائیگا۔