اب تک 30 چینی باشندوں کو گرفتار کیا جاچکا ہے، ایف آئی اے

فیصل آباد(ویب ڈیسک)ڈائریکٹر ایف آئی اے طارق رستم چوہان کا کہنا ہے کہ چینی باشندے انتہائی ضرورت مند فیملیز سے رابطہ کرتے ایسے لوگ بھی رابطہ کررہے ہیں جن کا اپنی بیٹیوں سے رابطہ نہیں تھا۔پاکستانی خواتین سے چینی باشندوں کی شادیوں کے ذریعے اسمگلنگ پر تحقیقات کرنے والے ایف آئی اے کے ڈائریکٹر طارق رستم چوہان نے فیصل آباد میں پریس کانفرنس کے دوران بتایا کہ ہم نے ابھی تک تیس چینی باشندوں کو گرفتار کیا ہے جن میں دو چینی خواتین بھی شامل ہیں۔طارق رستم چوہان نے کہاکہ ہم نے6 لڑکیاں بازیاب کرائی ہیں جن کی شادیاں کی گئی تھیں۔ڈائریکٹر ایف آئی اے کا کہنا ہے کہ ہم نے فیصل آباد کے پادری کو بھی گرفتار کیا ہے، اب تک مسیحی لڑکیوں کے 15 نکاح کے کیسزسامنے آئے ہیں۔انہوں نے کہا کہ لڑکیوں سے غیر اخلاقی کام کرانے کے شواہد ملے ہیں جبکہ پاکستان سے باہر جانیوالی سو سے زیادہ لڑکیوں کا ڈیٹا ہمارے پاس آچکاہے اور ایک گینگ بھی پکڑا ہے جو زمینی راستے سے شہریوں کو اسمگل کرتاتھا۔