اسلام آباد: وزیر خارجہ اسحاق ڈار نے کہا ہے کہ ایران کے صدر کا دورہ پاکستان پہلے سے طے شدہ تھا، افغانستان کے دورہ کی دعوت آئی ہوئی ہے مناسب وقت پر دورہ کریں گے۔
میڈیا کے نمائندوں سے غیر رسمی بات چیت میں انہوں نے کہا کہ سعودی عرب کے وفد کا دورہ پاکستان خوش آئندہ رہا کچھ سیاسی جماعتیں سعودی وفد کے دورہ پر سیاست کررہی ہے جو کہ افسوس ناک ہے، حکومت نے بیرونی سرمایہ کے لیے جو اقدامات کیے ہیں اسے سراہا گیا ہے اور سعودی وفد نے سرمایہ کاری کے لئے اقدام کی تعریف کی ہے۔
انہوں نے کہا کہ ہماری خارجہ امور سے متعلق پالیسی گائیڈ لائن پرامن ہے ہم مسائل کا پُرامن حل چاہتے ہیں ہم غزہ میں سیز فائر چاہتے ہیں، خارجہ پالیسی ایک جیسی ہے میرے آنے سے کوئی فرق نہیں پڑے گا۔
انہوں نے کہا کہ ہم سفارت کاری کو معاشی و اقتصادی سفارت کاری کی جانب لے جارہے ہیں 28 اور 29 اپریل کو سعودی عرب میں ورلڈ اکنامک فورم کا خصوصی اجلاس ہونے جارہا ہے وزیر اعظم شہباز شریف اور میں ورلڈ اکنامک فورم کے خصوصی اجلاس میں شرکت کریں گے۔
وزیر خارجہ نے بتایا کہ ورلڈ اکنامک فورم اجلاس کے بعد اسلامی ممالک کی تنظیم او آئی سی کا گیمبیا میں اجلاس ہے 2 اور 3 مئی کو او آئی سی وزرائے خارجہ کا اجلاس ہوگا او آئی سی وزراء خارجہ اجلاس میں ، میں پاکستان کی نمائندگی کروں گا او آئی سی سربراہی اجلاس 4 اور 5 مئی کو ہوگا وزیر اعظم شہباز شریف او آئی سی کے سربراہی اجلاس میں شرکت کریں گے۔
انہوں ںے کہا کہ پاکستان کی معیشت 2018ء میں مستحکم ہورہی تھی گزشتہ دور میں 2013ء کے بعد کی تمام محنت رائیگاں کردی گئی۔
اسحاق ڈار نے کہا کہ ایران اور اسرائیل کے معاملے پر دفتر خارجہ نے اپنا بیان جاری کیا تھا، کسی بھی سربراہ مملکت کے دورہ فوری طور پر پلان نہیں ہوتے ایران کے صدر کا دورہ پاکستان پہلے سے طے شدہ تھا، ایران اور اسرائیل کے درمیان صورتحال ابھی پیدا ہوئی اس کا اس دورے سے کوئی تعلق نہیں ایرانی صدر کا دورہ 22، 23 اور 24 اپریل کو ہوگا۔
وزیر خارجہ نے کہا کہ افغانستان کے دورہ کی دعوت مجھے آئی ہوئی ہے مناسب وقت پر دورہ کریں گے سعودی ولی عہد شہزادہ محمد بن سلمان کو دورہ پاکستان کی دعوت ہے تمام سفارتی امور کو حتمی شکل دینے کے بعد امید ہے دورہ ہوگا۔
