وارسا : (ویب ڈیسک) پولینڈ نے روس اور یوکرین کے درمیان جاری جنگ کی وجہ سے اپنے دفاعی بجٹ میں اضافے کا اعلان کر دیا۔
غیر ملکی خبر رساں ادارے کے مطابق پولینڈ کا دفاعی بجٹ اس کی جی ڈی پی کے صرف 2.5 فیصد سے بھی کم ہے لیکن پولش وزیراعظم موراویکی کا کہنا ہے کہ وہ اس سال اسے بڑھا کر 4 فیصد کرنا چاہتے ہیں۔
موراویکی نے کہا کہ یوکرین جنگ کو مد نظر رکھتے ہوئے ہمیں اپنے دفاع کو مزید مضبوط بنانے کی ضرورت ہے، یہی وجہ ہے کہ ہم اس سال ایک بے مثال کوشش کرتے ہوئے پولش فوج کے لئے بجٹ میں 4 فیصد تک اضافہ کریں گے۔
پارلیمنٹ نے گزشتہ ہفتے 2023 کے بجٹ کی منظوری دی تھی جس میں فوج کے لیے 97.4 بلین زلوٹی ($22.5 بلین) یا جی ڈی پی کا تین فیصد شامل تھا تاہم اس پر صدر کے دستخط ہونا باقی ہیں۔
خیال رہے کہ گزشتہ سال فروری میں یوکرین پر روس کے حملے کے بعد دیگر یورپی ممالک نے بھی اپنے دفاعی بجٹ میں اضافے کا اعلان کیا جبکہ پولینڈ نے حالیہ مہینوں میں اپنی دفاعی صلاحیتوں کو بڑھانے کے لیے جدید ہتھیاروں کے حوالے سے معاہدے بھی کئے ہیں۔
