لندن: (ویب ڈیسک) برطانوی وزیر اعظم بورس جانسن پارٹی گیٹ سکینڈل پر قوم سے معافی مانگ لی ہے۔
غیر ملکی میڈیا کی رپورٹ کے مطابق بورس جانسن کے خلاف پارٹی گیٹ سکینڈل کی تحقیقاتی رپورٹ میں کورونا لاک ڈاؤن کے دوران وزیر اعظم ہاؤس میں پارٹیوں کے انعقاد کو قائدانہ کوتاہی قرار دیا گیا ہے۔
تحقیقاتی رپورٹ آنے کے بعد اب برطانوی وزیراعظم بورس جانسن نے قومی سے معافی مانگتے ہوئے کہا ہے کہ میں معذرت چاہتا ہوں، میں لوگوں کے غصے کو سمجھتا ہوں، ہمیں اپنے آپ کو آئینے میں دیکھنا چاہیے اور سیکھنا چاہیے۔
رپورٹ میں کہا گیا ہے کہ وزیر اعظم ہاؤس اور وزراء کی رہائشگاہوں پر بعض پارٹیاں ایسی تھیں جن کو روکا جانا چاہیے تھا لیکن نہیں روکا گیا۔
واضح رہے کہ گزشتہ سال جب برطانیہ بھر میں لاک ڈاؤن نافذ تھا تو ٹین ڈاؤننگ اسٹریٹ میں پارٹیاں منعقد کی جارہی تھیں جن کو برطانوی میڈیا نے رواں ماہ بے نقاب کیا تھا۔

اوٹاوا: (ویب ڈیسک) کینیڈا کے وزیراعظم جسٹن ٹروڈو کا بھی کورونا ٹیسٹ مثبت آ گیا۔
کینیڈین وزیراعظم نے ٹوئٹر پر جاری بیان میں کورونا ٹیسٹ مثبت آنے کی تصدیق کرتے ہوئے بتایا کہ آج صبح ان کا کوویڈ 19 کا ٹیسٹ مثبت آیا ہے لیکن کوئی علامات نہیں ہیں اور وہ خود کو ٹھیک محسوس کر رہے ہیں۔
انہوں نے کہا کہ وزارت صحت کے وضع کردہ رہنما اصولوں کی پاسداری کر ر ہے ہیں۔ وزیراعظم نے عوام سے اپیل کی ہے کہ وہ کورونا ویکسین کے ساتھ ساتھ بوسٹر بھی لگوائیں۔
خیال رہے کہ دو روز قبل بیٹے کا کورونا ٹیسٹ مثبت آنے پر جسٹن ٹروڈو آئسولیشن میں چلے گئے تھے۔

نیویارک: (ویب ڈیسک) جے ایف کے ایئرپورٹ پر جیٹ بلو کی فلائٹس میں کئی گھنٹوں کی تاخیر کی وجہ سے سینکڑوں مسافر اتوار کی رات سے پھنسے ہوئے ہیں۔
نیویارک پوسٹ کے مطابق ائیرپورٹ پر طیارے کی پارکنگ والے حصے (Tarmac) میں گھنٹوں پھنسے رہنے کی وجہ سے مسافروں کی حالت بگڑ گئی اور بعض مسافر پینک اٹیک کا شکار ہوئے جبکہ متعدد مسافروں نے نشستوں پر ہی پیشاب کردیا۔
بعض مسافر جو اندر ویٹنگ ایریا میں رہ گئے انہوں نے کہا کہ ایئرپورٹ انتظامیہ نے انہیں یرغمال بنایا ہوا ہے کیونکہ فلائٹ کینسل کرنے کا کہا گیا تو انتظامیہ نے یہ بھی کرنے سے انکار کردیا۔
ایوی ایشن ایکسپرٹ جیسن ربینوویٹز نے بتایا کہ 20 فلائٹس رن وے پر منتشر کھڑی رہیں جس کی وجہ سے کوئی طیارہ بھی مسافروں کو لینے کیلئے گیٹ پر پہنچ نہیں پایا۔
اینی اسٹول نام کی ایک مسافر بتاتی ہیں کہ ان کی نیویارک سے بفیلو جانے والی فلائٹ کا ٹائم رات کے 8 بجے کا تھا لیکن 5 گھنٹے تک تاخیر ہوتی رہی۔ 5 گھنٹے بعد وہ جہاز میں بیٹھیں۔ لیکن ایک گھنٹے بعد تمام مسافروں کو جہاز سے یہ کہہ کر اتار دیا گیا کہ فلائٹ صبح 6 بجے تک لیٹ ہے تاہم صبح 7 بجے عملے کی جانب سے فلائٹ کینسل کردی گئی۔
مشتعل مسافروں کا کہنا ہے کہ وہ جیٹ بلو سے اس غیر ذمہ دارانہ انتظام پر وضاحت طلب کریں گے کیونکہ جس عملے سے بھی مسئلے کی وجہ پوچھی جارہی ہے تو کوئی بھی ٹھیک معلومات نہیں دے رہا جبکہ کچھ مسافروں نے سارے پیسوں کی واپسی کا بھی کمپنی سے مطالبہ کیا ہے۔

کابل: (ویب ڈیسک) طالبان حکومت کے وزیر برائے اعلیٰ تعلیم نے اعلان کیا ہے کہ 2 فروری سے تمام جامعات کھول دی جائیں گی تاہم سرد علاقوں کی یونیورسٹیز میں تعلیمی سرگرمیوں کا آغاز 26 فروری سے ہوگا۔
عالمی خبر رساں ادارے کے مطابق طالبان حکومت کے وزیر برائے ہائیر ایجوکیشن شیخ عبدالباقی حقانی نے پریس کانفرنس میں بتایا کہ ملک بھر کی اگست سے بند جامعات کو فوری طور پر کھولنے کا فیصلہ کرلیا ہے۔
شیخ عبدالباقی نے مزید بتایا کہ گرم علاقوں میں یونیورسٹیز 2 فروری سے کھل جائیں گی البتہ سرد علاقوں میں موسم کی سختیوں کے باعث تدریسی عمل کا آغاز 26 فروری سے ہوگا۔
تاہم وزیر برائے ہائیر ایجوکیشن نے یہ واضح نہیں کیا کہ جامعات میں طالبات کے لیے کیا پالیسی رکھی گئی ہے۔
قبل ازیں طالبان حکام اس بات پر زور دیتے آئے ہیں کہ جامعات کے نہ کھلنے کی وجہ طالبات کے لیے اساتذہ اور علیحدہ کلاسوں کا انتظام نہ ہونا ہے۔
ترجمان طالبان ذبیح اللہ مجاہد نے 15 جنوری کو میڈیا سے گفتگو میں کہا تھا کہ لڑکیوں کے لیے تعلیمی ادارے افغانستان کے نئے سال سے کھول دیئے جائیں گے۔ افغان سال نو 21 مارچ کو ہوتا ہے۔
واضح رہے کہ افغانستان عالمی قوتوں نے افغان فنڈز کی بحالی کو لڑکیوں کی تعلیم اور خواتین کی ملازمتوں پر واپسی سے مشروط کیا ہے۔

واشنگٹن: (ویب ڈیسک) مغربی ممالک میں ایل این جی کے ممکنہ بحران کے پیش نظر صدر جوبائیڈن نے امیر قطر کو امریکا آنے کی دعوت دی ہے تاکہ تیل بحران پر لائحہ عمل بنایا جا سکے۔
عالمی خبر رساں ادارے کے مطابق امریکی صدر جوبائیڈن نے یوکرائن پر روسی جارحیت کے نتیجے میں ممکنہ طور پر پیدا ہونے والے تیل کے بحران سے نبرد آزما ہونے کے لیے قطر سے مدد لینے کا فیصلہ کیا ہے۔
اس سلسلے میں قطر کے امیر تميم بن حمد بن خليفة الثاني وائٹ ہاؤس میں صدر جوبائیڈن سے آج پہلی ملاقات کریں گے۔ امیرِ قطر کی یہ ملاقات صدر جوبائیڈن کی دعوت پر ہورہی ہے۔
وائٹ ہاؤس سے جاری ہونے والے بیان میں کہا گیا ہے کہ ملاقات میں امیر قطر اور امریکی صدر مشرق وسطیٰ میں سیکیورٹی معاملات اور افغانستان کی صورت حال پر بھی تبادلہ خیال کریں گے۔
ماہرین کے مطابق قطر ایل این جی برآمد کرنے والا دنیا کا دوسرا بڑا ملک ہے جس اس سے قبل بھی توانائی کے بحران سے نمٹنے کے لیے مغربی ممالک کی مدد کرچکا ہے۔
ماہرین کے بقول اس وقت قطر امریکی اتحادیوں سمیت کئی ایشیائی ممالک کو ایل این جی فراہمی کے لیے سو فیصد پروڈکشن کررہا ہے ایسے میں امریکا کی مدد مشکل کام ہے۔
واضح رہے کہ افغانستان سے امریکی فوجیوں کے بحفاظت انخلا کے لیے طالبان سے مذاکرات کے لیے پلیٹ فارم قطر ہی نے فراہم کیا تھا جس کے باعث دونوں ممالک کے درمیان تعلقات مزید مستحکم ہوگئے ہیں۔

نیویارک: (ویب ڈیسک) اقوام متحدہ نے اپنی حالیہ رپورٹ میں افغان طالبان پر سابق اہلکاروں کے قتل کا الزام عائد کردیا ہے۔
سلامتی کونسل میں پیش کی گئی اقوام متحدہ کی رپورٹ کے مطابق طالبان کے اقتدار میں آنے کے بعد 100 سے زائد سابق حکام مارے گئے جبکہ دوتہائی سے زائد افراد کا افغان طالبان نے ماورائے عدالت قتل کیا۔
اقوام متحدہ کی رپورٹ کے مطابق مرنے والوں میں سابق افغان حکومت کے افسر، فوجی اور بین الاقوامی ملٹری کے ساتھ کام کرنے والے شامل ہیں جبکہ گرفتاری اور تشدد کے 44 کیسز میں سے 42 میں افغان طالبان ملوث ہیں۔